Boetnan di un maximo di 10 mil florin por cay pa esnan cu no cumpli cu ley
ORANJESTAD (AAN): Directora di Departamento di Impuesto (DIMP), Luenne Gomez-Pieters a elabora tocante e sistema di cobranza den recibo ya cu pa 2020 tur cifra mester ta den e prijs y no mag cobr’e apart.
El a remarca cu tabata tin dos cambio importante cu a tuma lugar na Januari 2019, caminda cu tur comerciante, segun ley, mester a pone prijsnan inclui e BBO, BAZV y BAVP.
Tambe tabata tin un parti den ley caminda cu e ta prohibi e comerciante pa por menciona e BBO, BAZV y BAVP ariba nan factura, Gomez-Pieters a indica.
Despues cu e ley aki a drenta na vigor tabata tin diferente comerciante cu a menciona cu nan ta drenta den un situacion fastioso pasobra nan tin cu cambia nan sistema. Pesey a bay delibera conhuntamente cu Minister di Finanza y a dicidi pa duna un prolongacion di e termino pa por adapta nan sistema.
Esaki a wordo prolonga un biaha y el a wordo prolonga un tiki mas te cu 1 di October. Pa despues di e fecha aki a yega na un conclusion cu e prome parti ta keda vigente. Esey kiermen cu no por duna un otro prijs na un consumidor caminda cu e BBO, BAZV y BAVP no ta hinca den e prijs. Si e producto ta costa 50 florin, 50 florin tin cu paga na caha.
Si a duna un espacio caminda cu e prohibicion cu tabata tin den ley no tey mas mirando cu e comerciantenan a vocifera cu nan lo kier specifica e suma cu ta wordo cobra na BBO, BAZV y BAVP ariba e factura, a bisa.
Segun Luenne Gomez-Pieters, loke no mag di menciona ta un otro porcentahe. Ta 6% conoce combina na BBO, BAZV y BAVP. Por scoge pa menciona e BBO, BAZV y BAVP ariba e factura y pa esaki tin tres manera cu a aproba cu esaki por sosode.
A ripara cu tin comerciantenan cu a cambia nan sistema y ta haciendo manera mester ta. Pero tambe ta mira cu tin comerciantenan cu no ta haciendo esaki. “Si nos no ta cumpli cu e leynan cu ta parti di compliance, nos ta mira diferente biaha e palabra aki ta cay kico Departamento di Impuesto ta haci pa cu compliance”.
Compliance kier cu ta cumpli cu reglanan den ley. Den e caso aki si un comerciante no ta tene su mes na e reglanan, naturalmente tin boetnan cu por wordo imponi na momento cu DIMP bay control.
Ta duna espacio ainda te fin di aña na e comerciantenan cu ainda no a cambia nan sistema y ta haciendo ainda e manera cu ley no ta acepta mas. Entrante 2020, lo cuminza cu e controlnan, e directora di DIMP a remarca.
Na Aruba ta bay bin cu un campaña caminda cu ta bay pidi colaboracion di e consumidor pa ora cu ta detecta algo cu no ta corecto ariba e factura, pa nan entreg’e na DIMP ya sea sacando un potret, of un copia di e factura y mand’e via Whatsapp. DIMP lo bishita e negoshi ey, a duna di conoce. Ta bezig ta wak con lo structura e sistema aki.
Tin un suma di boet cu ta den ley di maximo 10 mil florin pa negoshinan cu no ta cumpli
