ORANJESTAD (AAN): Den fin di siman, Caracas a haci denuncia cu un avion Mericano di guera a drenta den nan zona di control di Maiquetia Air Traffic Control, sin cu el a raporta su mes.
Segun e denuncia di Venezuela, ta trata aki di e avion tipo CN-235, cu a drenta den espacio aereo di Venezuela sin cumpli cu e protocolnan estableci. E informe a bin di Comando Estrategico Operacional di Fuerza Armada Nacional Bolivariana (Ceofanb).
Nan a mustra cu e avion a keda bula pa 34 minuut den espacio aereo Venezolano, sin cu e tin ningun flightplan, y sin establece comunicacion di Maiquetia.
Nan a indica cu e avion aki a drenta den e Air Traffic Control di Maiquetia riba Diabierna 15 di November 2019 pa 4:46 pm, segun e Sistema di Defensa Aeroespacial Venezolano a ripara riba nan radar.
Te banda di 5:21 pm e avion a bandona e zona di Maiquetia. Banda di 6:00 pm nan a perde contacto radar cu e avion CN-235 hopi cerca di Curacao. Pues nan ta asumi cu el a bay ateriza na e isla ey.
Segun Venezuela, nan sistema awor ta riba alerta maximo, den cuadro di e operacion “Venezuela Soberania y Paz”, y pesey radarnan di Codai ta den alerta tambe.
