ORANJESTAD (AAN): Riba Dialuna, algun di e clientenan cu a bira victima di fraude relaciona cu mesa di VIP pa concierto di Marco Antonio Solis, a bay entrega keho na autoridad hudicial. A haci esaki na oficina di Recherche na San Nicolas.
E clientenan aki for di varios luna caba a haci pago poco-poco na e tercera persona, esta Sra. Carnaval 2019 di inicial C.J.A. di 40 aña di edad. Algun di nan a finaliza e pago na luna di September caba.
Pero ultimo dianan aki, ni maske kico nan haci, e persona no tabata contesta mas nan yamada ni mensahe electronico. Esaki a desemboca den un Diadomingo di decepcion, suspenso, y tristeza pa e fanaticonan fiel cu na final a keda sin haya nan mesa, siendo cu for di basta tempo caba a haci full e pago.
Algun mesa tabata costa 7.000 Florin, algun 5.000 Florin, y tambe tabatin di 3.000 Florin. Esey ta loke e promotor Steve Hudson a declara Dialuna merdia den programa di Ivo Yanez na Canal 90.
Pero tanten cu e promotor no a haya placa, e no tabata duna tickets/banchi di e Mesanan. Y henter Diasabra y henter Diadomingo ningun cliente por a haya contesta di dje.
E promotor a bisa cu Diabierna 8 di November, cu e Sra. Carnaval a presenta na su oficina na yoramento pa bisa cu el a bende tur mesa pero e no tin e placa. El a bisa e promotor eynan cu esey a socede debi cu Departamento di Impuesto DIMP supuestamente a pone beslag riba su placa.
STORIA A CAMBIA:
Di berdad DIMP a pone beslag riba dje? Durante e programa di Ivo Yanez mes, e mesun Sra. Carnaval aki a bisa cu no ta trata di pone beslag, pero ta un muher cu el a confia, el a duna e placa pa cuida e placa pe den un Caha Fuerte.
Pero ultimo dianan a bin nota cu e no por haya e muher aki mas. Y pesey el a keda sin placa pa paga pa e Mesanan. Tabata raro cu e Sra. Carnaval no tabata sa di e ‘suma exacto’ ora cu Ivo Yanez a puntre pe.
Sra. Carnaval a splica cu e ta bayendo banco pa busca prestamo pa asina e paga tur hende bek. El a bisa cu e ta asumi responsabilidad, y cu e lo percura pa tur hende haya nan placa bek.
Esnan cu a perde di wak e concierto, ta lamenta cu nan chens di mira Marco Antonio Solis ya a bay perdi. Pesey awor nan a acudi na Recherche pa haci denuncia. Awor ta keda na Fiscal y Ministerio Publico pa actua.
E solo hecho cu e mesun Sra. Carnaval ta varios hende un storia diferente, ta pone hopi hende haya duda despues di a scuche papia na radio.
SMAC A EMITI BOLETIN:
Mientras tanto, Fundacion SMAC cu ta organiza Carnaval, a emiti Dialuna mainta un boletin bisando cu nan a tuma nota di noticianan cu a cuminza circula cu ta concerni Sra. Carnaval 2019.
Nan boletin ta bisa: “Nos di SMAC ta distancia nos mes di e situacion aki y lo laga husticia encarga nan mes cu e investigacion. Unavez tin un decision di esaki, nos di SMAC lo tuma pasonan si esaki ta necesario”.
MAS ARUBA CU BOLETIN:
Mientras tanto e asina yama Team di Produccion “MAS Aruba”, tambe a emiti un boletin Dialuna merdia.
Nan boletin ta mustra: “MAS Aruba a tuma nota di e situacion fastioso cu a presenta regardando Sra. Arrindell. Pa medio di esaki, Team di Produccion di e concierto MAS ta informa tur persona di ta tuma distancia for di e situacion mirando cu Sra. Arrindell ta completamente responsable pa e sucedido.”
