Home arte y espectaculo Weekend pa San Nicolas demostra un biaha mas cu e ta capital...

Weekend pa San Nicolas demostra un biaha mas cu e ta capital Caribense di arte di caya

302
0
SHARE
- Advertisement -

ORANJESTAD (AAN): E fin di siman aki un biaha mas San Nicolas lo tin spotlights cendi tur caminda, pa asina demostra cu di berdad e merece e titulo di “The Street Art Capital of the Caribbean”, manera e revista Forbes Magazine a indica recientemente.

Durante un conferencia di prensa convoca na Oficina di ArtisA na San Nicolas, Tito Bolivar un biaha mas a mustra cu artistanan for di rond mundo a yega pa asina traha riba muralnan sublime.

Aruba Art Fair ta tanto Diabierna 22, Diasabra 23, y Diadomingo 24 di November venidero.  Y parti di e cayanan lo wordo transforma na un forma unico y special, creando plataforma pa Aruba su propio artistanan, y tambe esnan internacional exhibi arte y duna presentacion.

Pa 2019, lo bay tin un total 3 “Pop-up Restaurant” den San Nicolas cu lo bay ta algo sumamente ameno.  Via di Departamento di Cultura, a haya sosten pa tur show cu lo ser duna, incluyendo show cultural, show moderno, y diferente cantante y poetanan dunando nan recital den cayanan di San Nicolas.

E artistanan internacional ta procedente di Republica Checo, Mexico, Argentina, etc., pa crea mural.  Nan ta sigui bay haci San Nicolas aun mas bunita.

Aruba Art Fair ta hayando keto bay sosten di Aruba Tourism Authority pa di cuatro biaha caba.  Tambe ta haya empuhe di Departamento di Cultura, Prins Bernard Fonds, Unoca, y demas stakeholder cu ta yudando.

Tita Iglesias, encarga cu events sponsorship na ATA, a splica cu nan ta costumbra caba cu ora tin prensa di exterior na Aruba, nan lo hiba nan pa San Nicolas pa mira e obranan di arte aki, y hunto cu ArtisA nan ta suministra splicacion, y motivacion di cada mural na e periodistanan.  Nan ta contento di ta sostene e evento di Aruba Art Fair 2019.

Alice van Romondt ta vice-presidente di Prins Bernard Fonds, y el a mustra cu nan a simpatiza e hecho cu Aruba Art Fair semper a sa di envolvi muchanan di scol den un proyecto asina grandi.

Pues hobennan di scol basico te na scolnan avanza ta bira activo den e feria di arte aki.  “Pa mi e ta un di e proyectonan cu ta sumamente importante pa Aruba, pa nos hendenan, y pa artistanan existente y di futuro.”

Muralnan ta wordo considera como arte?  Aki Alice van Romondt a mustra cu e muralnan na San Nicolas a trece un bista nobo riba loke ta arte y kico e balor di arte ta.

El a mustra cu si hasta Forbes Magazine ta yamando San Nicolas como Street Art Capital of the Caribbean, e ora no mester discuti academicamente si e ta arte of no.

Prins Bernard Fonds ta yuda tambe cu e intercambio di artista di otro islanan cu ta bin Aruba pa forma parti di Aruba Art Fair.

E curator di e exposicion di e street art na Aruba, ta procedente di Curacao, esta Lusette Verboom, kende ta doño curator di Kas di Alma Blou.

Pa 2019, Verboom lo ta treciendo escultura di piedra- y demas materialnan natural pa cual Curacao ta hopi conoci pe.  Esey lo ta parti nobo di e exposicion.

Jhon Freddy Montoya di Departamento di Cultura, a mustra cu un biaha mas nan ta hopi contento di ta forma parti di Aruba Art Fair 2019, y pa sostene e ambiente creativo di artistanan local.

Diabierna dia 22 nan lo dirigi esey na poder di hubentud, cu arte, poesia, canto, musica, baile, arte di palabra, etc.

Diasabra 23 nan lo bay ta mas riba performance art di Aruba cu lo ta riba caya.

Diadomingo 24 nan lo ta habri escenario di participantenan di 12 otro pais cu ta bay contribui na arte.

Nan ta sigur cu Aruba Art Fair ta un medio unda tur artista lo duna un man pa mustra con poderoso e parti di cultura aki ta.

 

- Advertisement -

DUNA COMENTARIO

Please enter your comment!
Please enter your name here