Home Hudicial Yiu muher a uza su mama pa trafica droga di Aruba pa...

Yiu muher a uza su mama pa trafica droga di Aruba pa Merca

200
0
SHARE
- Advertisement -

E mama y un amiga ta deteni

ORANJESTAD (AAN)  – E muher L.P. (60) y e muher C.B. (52) biba na Merca a bisa Hues cu nan a haya e shock di nan bida ora cu na Aruba nan a wordo deteni cu un maleta cu 3.1 kilo di cocaina. L.P. a bisa Hues cu su yiu muher a pidi’e pa bin busca cos na Aruba y lo ricibi 5 mil dollar.

E mama a kere cu ta placa e lo mester a bin busca. C.B. a dicidi di bin Aruba hunto cu L.P. pa celebra su cumpleaños. Awor tur dos ta encarcela den KIA y a wordo condena na castigo di prison.

MALETA CU COCAINA

Hues a bisa e dos sospechosonan cu segun e raport di Polis, dia 8 Juli 2019 nan a keda deteni na aeropuerto cu maleta cu bandanan falso cu 3.1 kilo di cocaina aden. Ambos a bisa cu nan tabata sa cu mester a transporta algo pero no droga.

Un homber cu dread logs a acerca nan y nan lo haya 5000 dollar pa hiba e maleta. C.B. a bisa cu e no tabata sa cu tabatin droga den e maleta. Hues a bisa cu nan tabata sa cu lo hiba algo pero no sa kico. Hues a bisa cu nan ta responsabel pa e maleta.

YIU A MANDA MAMA BUSCA DROGA

Hues a bisa cu e yiu homber di L.P. a manda carta pa Corte mustrando cu e no por compronde cu su mama ta haci algo asina. Na opinion di e yiu homber, su mama no ta un persona cu ta haci algo asina. L.P. tabata yora ora cu Hues tabata bisa kico el a lesa den e carta. Ta asina cu L.P. tin dos trabou na Merca entre otro cuida hendenan di edad. L.P. a bisa Hues cu su di dos yiu muher a pidi’e pa bin Aruba pa busca algo y cu e ta haya placa pa esaki.

YIU A ABUSA DI CONFIANZA DI SU MAMA

Hues a bisa L.P. y C.B. cu ta conoci cu si acepta maleta di hende cu no conoce y hiba esaki pa otro lugar, esaki hopi biaha tin droga aden y esey ta castigabel. Segun L.P. el a confia su yiu muher, kende a bisa cu e persona ta su amigo. E no por kere cu su yiu ta haci algo asina cun’e. E no a pensa mes cu ta droga el a bin busca na Aruba pa hiba Merca. El a kere cu ta placa e lo mester a bin busca y cu esey no ta un problema serio. E nunca a pensa cu su yiu muher ta hinca den droga.

Hues a puntra C.B. pakico el a bin Aruba. Segun C.B. el a bin Aruba pa celebra su cumpleaños den un fin di siman. C.B. a sigui bisa cu nunca el a spera cu e yiu muher di L.P. ta bay haci algo asina cu nan. C.B. a bisa Hues cu e tin 52 aña y nunca el a cay den man di husticia. Pakico awor e ta bay cuminsa cu algo asina.

EXIGENCIA DI FISCAL

Fiscal a bisa Hues cu e ta haya cu hunto L.P. y C.B. a transporta 3.1 kilo di cocaina. Fiscal a mustra cu nan a bin hunto Aruba pa busca algo pa hiba Merca. Nan a kere cu ta placa nan a bin busca. Na opinion di Fiscal, L.P. y C.B. no a controla e maleta cu tabatin bandanan falso cu cocaina. Hues a remarca cu transporta placa tambe ta un actividad ilegal. Fiscal ta puntra su mes, si e duo aki ta compronde cu loke nan a bin pa haci ta ilegal. Si a bin pa busca placa y ta haya 5 mil dollar ta mustra cu ta haciendo algo ilegal. Fiscal ta haya cu e duo aki ta bay di mas di bisa cu nan no tabata sa y cu e yiu muher a gaña nan.

Fiscal a mustra cu Aruba ta wordo mal usa pa traficantenan di droga como trampolin. Fiscal ta haya cu mester manda un señal bon cla cu no ta tolera esaki. Pa ta promer biaha cu e duo aki ta cay sera, el a exigi 14 luna di prison, kitando e tempo cu nan ta sera den KIA.

ABOGADO

Mr. Sjiem Fat cu a ocupa pa abogado mr. Kock, a bisa Hues cu e yiu muher a sorprende nan cu e ta paga nan pasashi y estadia pa asina C.B. por celebra su cumpleaños na Aruba. E mama L.P. y C.B., segun e abogado, no por a kere cu nan a wordo usa pa transporta droga. Nan a kere e yiu muher cu a bisa nan cu nan lo mester busca un cantidad di placa y hiba pa e yiu. Nan a keda sorprendi ora cu nan a wordo deteni pa transporta cocaina pa Merca.

E abogado a bisa Hues cu e no ta haya cu por papia aki di complice di traficacion di droga. El a bisa cu ora nan tabata kedando na e hotel, nan a wordo yama door di e yiu muher cu a bisa nan cu su amigo a yega na e hotel cu e maleta pa nan hiba Merca. Na opinion di e abogado, e duo a actua bobo door di no a controla e maleta. Nan ta realisa cu nan a wordo uza y cu transporta droga ta contra ley. E abogado a bisa Hues cu e duo ta haya cu nan por a confia riba e yiu muher di L.P. Abogado mr. Sjiem Fat a pidi Hues pa declara nan liber pa trafica cocaina of condena nan igual na loke nan ta sera caba den KIA.

SENTENCIA

Hues, despues di a scucha e dos sospechosonan, a bisa cu e ta sera tratamento di e caso y cu e ta dicta sentencia di biaha. Hues a bisa cu el a studia e caso completamente y a pone bon atencion na tur loke tanto Fiscal, abogado como e sospechosonan a bisa. E ta haya cu e por dicta sentencia y a haci esey tambe.

Hues a bisa cu e ta haya legalmente proba cu L.P. y C.B. a exporta cocaina y tabatin esaki cu nan. Hues a mustra cu ora e duo a haya maleta for di hende cu nan no conoce, nan a tuma risico. Hues a bisa cu e no ta comparti punto di bista di abogado cu nan no ta complice. Hues ta haya cu e duo L.P. y C.B. ta complice di trafica cocaina.

Hues a mustra cu ta lamentable cu na Aruba tin hopi caso di trafica droga. El a tene cuenta cu tur loke a wordo bisa y a mustra cu pa e cantidad di cocaina cu e duo a transporta, segun ley e castigo ta 24 luna di prison. Hues a bisa cu Fiscal a exigi hopi mas abao, teniendo cuenta cu nan circunstancia. Hues a condena nan na 24 luna di prison di cual 12 luna ta condicional cu un tempo di prueba 2 aña.

Hues a splica nan cu segun ley, lo mester sinta 2/3 parti di castigo cu ta 8 luna di prison o sea algun luna mas y despues nan lo regresa Merca.

 

- Advertisement -

DUNA COMENTARIO

Please enter your comment!
Please enter your name here