Home Editorial 2020 mester conoce un restructuracion di  comercio

2020 mester conoce un restructuracion di  comercio

52
0
SHARE
- Advertisement -

Editorial

2019 ta cera cu un lista di problema den mundo comercial, cu ta e base di economia, financia y desaroyo social di Aruba. No ta trata solamente di problemanan relaciona cu aumento di costo di bida, menos placa den circulacion, falta di poder di compra cu ta haya atencion di gobierno na e momentonan aki.

E problemanan mas grandi cu comercio di Aruba conoce, ta structural. Nan ta problemanan cu a desaroya y crece pa diferente motibo durante basta aña, sin haya un solucion.

Na 2014 ya comercio di Aruba a mustra riba problemanan structural cu mester wordo atendi ya cu nan ta forma peliger pa negoshinan di Aruba.

Un di e rapportnan importante cu a mira luz na 2019, ta e relato di Banco Central di Aruba cu a investiga e gastonan pa haci negoshi na Aruba y e problemanan cu cual negoshi di Aruba ta wordo confronta.

Na un forma special a atende cu negoshinan chikito y mediano. Den e categoria aki ta topa cu cantidad di cas comercial di Aruba cu a tene e pais riba pia den circunstancianan dificil cu e pais a conoce y ta aporta na comunidad aparte di belasting y tur exigencia legal.

2019 tabata sumamente dificil pa comercio debi na e acumulacion di problemanan nacional cu a nace for di un mal maneho financiero di gobierno durante hopi tempo, sumanan enorme cu Aruba mester paga pa proyectonan demasiado costoso y innecesario.

E peso di 2019 tabata hopi grandi ya cu hopi empresa a confia den e loke a wordo priminti na 2016 cu tabata un crecemento economico di 15 porciento pa Aruba. Ora e crecemento no a bini y comercio mester yuda paga debe den forma di belasting, e falta di solucion di problemanan structural a wordo confirma.

Problemanan structural na Aruba a crece cu e entrada di benta pa medio di computer bou su diferente nombernan manera Online y E-commerce, cu ta sigui avansa. E impacto riba comercio ta grandi pasobra benta Online ta deshaci di comercio local pa importa directamente di exterior.

Otro problema structural a crece enormemente ora competencia di exterior a aumenta cu mercado negro, black market, pero pio ainda cu negoshinan gigantesco di cadenanan internacional cu ta competi cu tur negoshi chikito na Aruba.

E crecemento enorme di e negoshinan internacional na Aruba tabata tin un reis den e situacion na Venezuela. Hopi comerciante stranhero di diferente pais cu laso internacional, a bandona Venezuela y ta habri negoshi na Aruba cu permiso oficial.

Entrada como trahado of partner di un negoshi existente ta habri caminda pa haya permiso pa habri negoshi na Aruba.

E problemanan cu a presenta na 2019, ta exigi pa na 2020 introduci un restructuracion di comercio den cual ta bay investiga e competencia cu ta afecta negoshi chikito y mediano di Aruba.

Mester investiga e capacidad comercial pa diferente ramo di negoshi y mescos cu a pasa riba tereno di hotel y supermercado bini cu rapport oficial pa por yega na un moratorio pa entrega di permiso di establecimento stranhero.

Mester restructura entrada online di producto y mester restructura comercio cu leynan di control di calidad y competencia sano.

2020 ta exigi pasonan necesario pa sostene negoshi local, baluarte economico, social y financiero di Aruba.

- Advertisement -

DUNA COMENTARIO

Please enter your comment!
Please enter your name here