2020 por bira aña di eleccion pa Aruba

    1315
    0
    SHARE
    - Advertisement -

    Analistanan ta mira consolidacion liderazgo Evelyn Wever-Croes 

    • Evelyn Wever-Croes a profila como lider den turbulencia pisa
    • Reino a sostene base politico solido pa enfrenta decada nobo 

    ORANJESTAD(AAN)– Dos siman falta pa Aruba drenta siman di Pasco cu lo wordo sigui pa cambio di aña y entrada pa un decada nobo.  Dies aña a pasa for di 2009 ora Aruba a drenta un epoca di desaroyonan cu directamente a afecta su futuro y a haci 2019 un aña di turbulencia pisa.  Ta den e situacion sumamente dificil di 2019,  marca pa problemanan local mientras e situacion regional a bira explosivo cu e desaroyonan na Venezuela, cu Evelyn Wever-Croes a bini dilanti como un lider nacional.

    Pa DIARIO un aña cu a exigi trabou periodistico pa por a informa pueblo cu informacionnan oficial den man, ta bini cu e demanda pa analisa e sucesonan cu por spera na 2020.

    Analistanan y expertonan cu a sostene e trabou di DIARIO pa informa Aruba, ta di acuerdo cu e situacion politico actual di Aruba lo bay exigi consolidacion di liderazgo cu ta encera cu lo mester consulta pueblo pa yega na un base mas fuerte den Parlamento como base di gobernacion democratico.

    Den e desaroyo aki e necesidad di e pais di tin un lider cu por duna guia y cu no ta core pa responsabilidad y ta wordo respeta dor di Reino Hulandes, ta importante.

    “Aruba a cay den un turbulencia den cual generalmente un pais ta perde control. E turbulencia den mundo politico ta haya e ora expresion den falta di organismonan importante pa haci nan trabou y den mundo di empresa priva pa bini cu plannan cu ta sostene e futuro di e pais. Esaki no tabata e caso na 2019 na Aruba, caminda na e momento cu tabata tin problema, semper Evelyn Wever-Croes a lanta para pa busca solucion.”

    Analistanan ta mustra cu loke a pasa cu Aruba for di 2017, na hopi pais lo a habri porta pa crisis politico tras di otro y hasta eleccion tras di eleccion pa motibo di falta di liderazgo.

    Na varios ocasion Aruba a haya su mes den situacionnan culminante den politica tanto na Aruba mes, den Reino y hasta den region. Pero Aruba a wordo anima pa liderazgo cu a bira e forsa di e pais pa busca solucion manera den tur sector a bini dilanti.

    E forma cu Reino a atende cu Aruba a duna prueba di negociacion riba e formulanan mas importante pa bienestar di Aruba cu ta topa atrobe den rapportnan experto di instancianan oficial cu ta bira mas activo y ta duna contenido abierto na nan papel di guia e pais den bon rumbo.

    Na e momentonan aki e salida di Daphne Lejuez for di coalicion a baha e sosten cu gobierno mester den Parlamento. Mientras e impresion ta wordo crea cu oposicion kier eleccion, consulta di pueblo na e momentonan no ta na fabor di e partido mas grandi di oposicion, cu ta perde riba hopi punto pa convence pueblo.

    Ta den e turbulencia politico actual, e liderazgo di Evelyn Wever-Croes a haya confirmacion y analistanan informante di DIARIO ta considera cu e chens ta grandi cu despues di tratamento di e cifranan oficial di e pais na 2020, Aruba ta bay urna electoral pa pueblo expresa su mes atrobe.

    Basando nan mes riba tur aspecto den e desaroyo democratico di e pais, ta tene na consideracion cu 2020 lo bira e aña di consolidacion politico pa Aruba cu lo opta pa un liderazgo fuerte di Evelyn Wever-Croes.

     

    - Advertisement -

    DUNA COMENTARIO

    Please enter your comment!
    Please enter your name here