Home Hudicial 5 aña di prison exigi pa duo cu a haci asalto arma...

5 aña di prison exigi pa duo cu a haci asalto arma pafor di banco

137
0
SHARE
- Advertisement -

Ambos ta para riba cu nan ta inocente

ORANJESTAD (AAN) – E hombernan J.G.M. y J.M. acusa di a haci un atraco arma riba un persona cu tabata hiba placa di dos pomp di gasoline pa deposita, a scucha Fiscal exigi 5 aña di prison pa cada un. Abogado mr. Kip cu a defende tur dos ta haya cu no tin ningun prueba sino cu e declaracion di e homber R. E sospechosonan ta para riba cu nan no a haci nada.

Den e articulo aki DIARIO ta publica tratamento di e caso y exigencia di Fiscal y den un otro articulo ta publica e punto di bista di abogado mr. Kip.

E acusacionnan cu Fiscal a presenta contra J.G.M. y J.M. ta cu riba 1 April 2019, nan a haci un asalto arma riba un homber cu a bay hiba placa di e pompstation Tanki Leendert y Sasaki pa deposita. Tambe Fiscal ta acusa nan di posicion di arma di candela riba 1 April 2019. Fiscal ta acusa J.M. tambe di posecion di un arma di candela cu 10 bala.

ASALTO ARMA

Hues a mustra cu e asalto arma a sosode pafor di un banco, na momento cu e homber A.H. kier a baha cu e placanan di e dos pompstation pa deposita. Den Corte J.M. y J.G.M. ta desmenti caterogicamente. Hues a bisa cu na Polis tambe nan a nenga di duna declaracion. Hues a bisa cu e homber A.H. cu ta tuma placa di e dos pompstation cada dia pa hiba banco, a declara na Polis cu ora el a para pa baha, un auto a para banda di dje y un persona a baha y bis’e pa duna e saconan.

E saconan hunto tabata contene mas cu 48 mil florin. Hues a bisa cu tin dos auto envolvi. Polis a haci investigacion cu ta mustra cu e homber R. lo tabata esun cu tabata maneha un auto. R. a bisa Polis cu un Venezolano El Gocho lo kier a haci un asalto arma. Segun R., J.G.M. y J.M. lo ta esnan cu lo a haci e asalto arma. Asina a keda planea. R. a bisa Polis cu riba laman den boto, J.G.M. cu ta capitan di boto, a splica con tur cos a keda planea.

A para un auto banda di un pizzeria na Tanki Leendert y e otro a usa pa e asalto arma. J.M. a bisa Hues cu e no ta envolvi. Hues a puntra pakico R. ta bisa asina contra J.M. Segun J.M. por ta pasobra R. ta sospecha cu nan tin relacion sexual cu su partner. Ta asina cu na cas di R. a haya placa cu lo ta procedente di e asalto arma. J.M. a bisa Hues cu ta cu R. mester atende e ora ey. J.G.M. ta traha cu un watersport como capitan y a bisa Hues cu e no ta compronde pakico R. ta menciona su nomber.

TAS CU ARMA Y BALA

Relacion cu e caso aki, Polis a bay haci investigacion na e cas caminda J.M. y J.G.M. ta biba na Pos Abao. A haya den e camber di J.M. un tas cu un pistol y 10 bala. Ta asina cu J.M. a admiti cu e arma ta di dje.

Ta sospecha cu e arma ey ta esun cu lo a haci asalto arma cun’e. Hues ta haya cu e imagennan di video ta cuadra cu loke R. ta bisa esta cu a usa auto pa haci asalto.

Ta asina cu R. a mustra Polis unda J.M. y J.G.M. ta biba. Tambe el a mustra Polis unda e auto tabata staciona. E auto den cual e tabata pa bay cu esnan cu a caba di haci e asalto. Ta asina cu R. lo a haya 3 mil florin y e duo a keda cu e resto.

RECORD NA POLIS

Hues a mustra cu J.M. tin carchi di castigo. Na 2009 el a wordo condena na 8 aña di prison pa maltrato cu consecuencia morto. Na 2017 el a sali liber y awor ta deteni pa e asalto arma. J.G.M. tambe tin carchi di castigo pero hopi largo. Hues a mustra cu na 2009 a condena J.G.M. na 10 aña di prison pa un cantidad di ladronicia. Na 2015 el a wordo laga liber y na 2018 el a wordo condena na 3 luna di prison pa posecion di droga.

Tanto J.M. como J.G.M. a bisa Hues cu nan ta sera por nada y nan kier bay cas.

DEMANDA DI DAÑO

Demanda algo mas cu 48 mil florin cu ta loke e pomp di gasoline na Tanki Leendert a produci.

EXIGENCIA DI FISCAL

Fiscal a bisa Hues cu ambos sospechoso no kier a duna declaracion na Polis. E ta haya cu a keda legal proba cu nan ta complice di e asalto arma. Fiscal a mustra cu e persona H. cu ta encarga pa hiba placa di pomp di gasoline pa deposita na banco a bisa cu un di e personanan a bise: “Para keto”.

Na opinion di Fiscal, e testigo R. su declaracion ta cuadra cu loke a sosode. El a duna declaracion amplio ora el a wordo deteni. R. lo tabata esun cu tabata encarga cu e di dos auto pa huy.

Fiscal a mustra cu R. a splica unda J.G.M. y J.M. ta biba banda di e pomp di gasoline na Tanki Leendert. R. a duna declaracion tambe cu J.M. tabata sera pa a mata homber na un snack bar na Madiki. R. a bisa cu J.G.M. a bis’e cu nan a horta un auto cu ta cla pa core.

E homber P. na Maart 2019 a haci denuncia di ladronicia di auto. Investigacion a mustra cu J.G.M. a kita tur e combersacionnan cu tabatin riba su cellular promer y despues di e asalto arma. Fiscal ta haya hopi straño cu J.G.M. a kita e combersacionnan aki.

El a bisa Hues cu riba imagennan por mira cu e Ford Explorer tabata para banda di e auto di e homber H. Tur esakinan ta cuadra cu declaracion di R. Fiscal ta haya e declaracion di R. hopi confiabel. El a bisa cu R. a reconoce e dos sospechosonan riba potret como esnan cu a haci e asalto arma.

Fiscal ta haya cu J.G.M. y J.M. ta complice di asalto arma y posecion di arma di candela. Haya cu e duo aki tabata vigila e pomp di gasoline for e cas na Pos Abao.

R. a haya 3 mil florin pa su participacion y nan a keda cu mas o menos 45 florin. Fiscal ta haya J.M. culpable pa posecion di arma cu 10 bala 27 Mei 2019.

CASTIGO

Pa cu e castigo, Fiscal a mustra cu asalto arma ta un caso hopi serio. Posecion di arma di candela tambe ta hopi serio. Arma di candela ta wordo usa pa sea tira hende of menaza hende. Den e caso aki a menaza e homber H. cu un arma.

Fiscal a bisa cu e ta tene cuenta cu seriedad di caso y cu J.G.M. tres biaha a wordo condena pa asalto arma. El a exigi pa J.G.M. 5 aña di prison, kitando e tempo cu e ta sera den KIA.

Pa loke ta J.M., Fiscal a mustra cu J.M. tambe tin carchi di castigo y cu e tabatin un arma di candela cu 10 bala. Fiscal a exigi tambe 5 aña di prison pa J.M., kitando e tempo cu e ta sera den KIA.

Fiscal a bisa Hues cu e ta haya cu mester aproba e demanda di daño cu ta algo mas cu 48 mil florin y impone medida di pago. Hues despues di a scucha e defensa di abogado mr. Kip a bisa cu e ta bay studia e caso y dia 20 December 2019 lo tin sentencia pa 8.30

 

- Advertisement -

DUNA COMENTARIO

Please enter your comment!
Please enter your name here