Home arte y espectaculo Artistanan local ta invita bo pa un anochi magico

Artistanan local ta invita bo pa un anochi magico

286
0
SHARE
- Advertisement -

Na caminda pa “Hey… ta Pasco!” den Ser’i Noka…

ORANJESTAD (AAN):  Diahuebs 19 di december proximo, e teatro monumental y historico di Ser’i Noka lo bisti di gala pa ta e anfitrion di e regreso di e gran concierto “Hey… ta Pasco!” di Edjean Semeleer.

Esaki lo no ta solamente e celebracion di Edjean su 25 aña den farandula, pero tambe e lo ta un esfuerzo pa yega na mas fondo pa sigui cu e trabao di restauracion y renobacion di nos teatro den aire liber.
Varios artista, entre nan cantante y musiconan local, a uni nan mes na e proyecto aki, considerando su importancia y balor cultural.

Algun cu nos ta menciona awe ta Rocco Franken, Maryann Rodriguez, Buddy Vesprey y Jeanedy Semeleer cu ta cantantenan hoben excelente y exitoso cu uni pa brinda nan apoyo y sosten completo na e proyecto aki.

E cantantenan aki a expresa nan admiracion y respet pa e trabao impactante cu Edjean ta haciendo pa 25 aña caba y nan ta sinti nan mes honra di por bay comparti escenario cune durante un concierto asina spera, stima y gusta.

Nan ta manda nan invitacion cordial na pueblo di Aruba pa asisti e anochi aki di 19 di december pa disfruta di un recital navideño magico y aporta na e hazaña di restaura, renoba y crea un era nobo pa nos anfiteatro di Ser’i Noka.

E lo ta un anochi espectacular den cual e herencia y rikeza musical di nos Tata di Cultura tambe lo resalta.

Nos artistanan ta comprometi pa sigui e ehempel y deseo di nos Padu Lampe, un gran propagador di nos cultura musical, pa sigui cu e esfuerzo di mantene nos identidad bibo y sigui promove nos herencia cultural y rikeza musical.

Companianan local manera New India Assurance, Setar, Super Food Plaza, Aruba Tourism Authority, Aruba Bank, Fantastic Gardens, Chocoglam, Subway, High Performance y Printshop a mira hopi importancia y balor agrega di e proyecto “Hey… ta Pasco!” y pesey a dicidi di brinda nan maximo sosten pa e por ta un realidad.

Incluyendo nos sister city cu ta Doral na Florida, via e organisacion OASCA (Oranjestad-Aruba Sister Cities Association).

Esaki ta sirbi como ehempel cu nos artistanan local tin un rol sumamente importante den uni y inspira henter un comunidad.

 

- Advertisement -

DUNA COMENTARIO

Please enter your comment!
Please enter your name here