Home General Aruba mester di mas ley pa e anda cu e problema di...

Aruba mester di mas ley pa e anda cu e problema di violencia domestico, cu ta un crimen

66
0
SHARE
- Advertisement -

Magaly Maduro, presidente di FHMD:

ORANJESTAD (AAN) – Manera ta conoci siman cu a pasa Fundacion pa Hende Muher den Dificultad a conmemora e “Dia Internacional pa elimina violencia contra hende muher’ cu tambe ta wordo yama “E dia pa bisti e mundo di Orange”.

Dentro di e marco di Actividadnan di e dia aki pa bisti di Orange, FHMD tabata tin dos dia di conferencia pa capta atencion di tur esnan envolvi den Husticia, cu ta parti di e 16 dianan di concientizacion organiza pa e fundacion, cuminzando dia 25 di November cu tabata e “Dia Internacional pa elimina violencia contra hende muher”, cu precisamente FHMD a cumpli 24 aña di existencia.

Den entrevista cu e Presidente di e directiva di FHMD, sra. Magaly Maduro, el a comenta cu e prome dia di e conferencia no tabata tin hopi informacion pa duna, pero si ta asina cu Minister di Husticia ta trahando riba e leynan rekeri pa yega na e meta.

Sra. Maduro a expresa cu e trabao cu e fundacion ta haciendo ta dunando su fruto, y el a hala atencion di esnan cu ta traha riba ley, y FHMD ta bayendo den bon caminda.

Maduro a subraya cu mester di mas ley pa anda cu e tema di violencia domestico, cu ta un crimen. E leynan mester proteha tanto hende muher como hende homber pasobra awendia mas hende homber ta bin dilanti cu nan tambe ta pasa aden di e situacionnan di violencia y no por discrimina.

Aunke e grupo meta di e fundacion ta hende muher, mirando e problema cu tin, no por hala e hendenan homber un banda y loke nan pasa den bida como ser humano, y tampoco por lubida riba e muchanan.

Fundacion Hende Muher den Dificultad ta den combersacion continuo cu directivanan di scol, pero no ta asina sin ma cu nan por drenta scol, pasobra scol tin su structura.

Pero falta concretiza con pa drenta scolnan pasobra enseñanza na Aruba y rond mundo, ta pone enfasis riba siña lesa, skirbi, siña matematica y demas materia, pero e parti di e ser humano no a drenta ainda, siña con pa anda cu conflicto, con pa maneha situacionnan di stress, nos muchanan no ta wordo siña.

Hopi hende ta señala cu esey ta tarea di maestronan, pero mester ta realista. Magaly Maduro pone acento riba e hecho cu nos ta bibando den un epoca na unda mayornan ta traha, y tin cu ta traha doble turno pa sobrebibi y esaki ta trece cune hopi negligencia riba nan yiunan.

Si no actua awo aki cinco pa diez aña nos lo tin un comunidad cu no tin norma y balor, cu ta hopi violento, cu no sa con pa bay cu conflicto, ni como atende cu stress. Esey lo ta hopi lamentable.

E generacion di relevo ta esun cu tin cu bay dirigi nos pais, atende e muchanan, y si nan mesun fundeshi ta debil, kico nan lo por aporta na nos pais? Magaly Maduro a conclui bisando cu momento cu nos comunidad compronde esaki, y traha na dje lo por drecha e futuro pero tanten no compronde esey nos ta hibando awa pa lama.

- Advertisement -

DUNA COMENTARIO

Please enter your comment!
Please enter your name here