Astronautanan di International Space Station a otorga premio na Dr. Edward Cheung di Aruba

    969
    0
    SHARE
    - Advertisement -

    ORANJESTAD (AAN): Durante un ceremonia teni Diamars anochi na Johnson Space Center na Houston, Texas (Merca), e tripulacion di astronauta di International Space Station (ISS) a otorga diferente Premio na ingeniero y cientificonan cu ta sostene nan cada mision.

    Un di esnan cu a ricibi un Premio, ta Dr. Edward Cheung di Aruba.  E cientifico Arubano pa hopi decada caba ta trahando cu NASA, y sigur esaki tabata un ocasion cu e no a perde.

    Dr. Edward Cheung y su casa Agnes a viaha pa Houston pa asina tey presente na e Award Ceremony.

    Seis astronauta Mericano cu tabata abordo di e International Space Station pa hopi tempo, a cuminza e anochi cu discurso, mustrando nan aprecio pa tur esnan cu ta duna nan respaldo, tanto durante lanzamento, e trayectoria den espacio, y e regreso.

    Como 50 persona clave di NASA a haya reconocimento di e astronautanan aki, y Dr. Edward Cheung ta uno di nan.

    Pa demostra con orguyoso Dr. Cheung ta pa representa Aruba, el a acudi bisti cu bachi, y e dashi ta esun di bandera di Aruba.  Aruba semper ta hopi cerca di su curazon, y pesey e dashi ta como un magnet di atraccion riba su outfit.

    Na final di e ceremonia, nan a haya chens di combersa cu e astronautanan. Dado momento e astronauta David St. Jacques a hasta yega cerca di Dr. Cheung, y el a ripara e dashi.  El a comenta na Dr. Cheung cu esey ta “nice tie”, pues bunita dashi.

    Aki ta unda cu Dr. Cheung a haya chens di splica e astronauta, cu e ta procedente di Aruba, y el a invite pa e bay pasa par di dia di vacacion na e isla.

    Na su turno, astronauta David St. Jacques a bise cu e mes ta un persona cu ta practica windsurfing, y e sa cu Aruba ta famoso entre tur windsurfernan.

    DIARIO ta felicita Dr. Cheung cu e Award bon mereci aki, y riba potretnan por mira mas di e ceremonia.

     

    - Advertisement -

    DUNA COMENTARIO

    Please enter your comment!
    Please enter your name here