Home Gobierno Aworaki ta mihor pa Aruba pa e frontera cu Venezuela keda cera

Aworaki ta mihor pa Aruba pa e frontera cu Venezuela keda cera

298
0
SHARE
- Advertisement -

Prome Minister Wever-Croes

*Tin mas cu 2 mil persona a pidi asilo y mas di 10 mil persona ilegal

ORANJESTAD (AAN):  Diabierna ultimo tabata tin un reunion entre gobierno y diferente departamento clave na Aruba pa asina sigui atende cu e asunto di Venezuela.

Prome Minister Evelyn Wever-Croes a bisa den entrevista cu DIARIO cu e situacion na Venezuela ta keda empeora y esey tin Gobierno hopi preocupa.

E impacto di e crisis ayanan ta hopi grandi na Aruba tambe. Esey ta e motivo principal pa cual a tuma e decision pa prolonga e ciere di frontera. A cera e frontera na Mei, a prolog’e un par di biaha y e lo a vence dia 10 di December, pero a tuma e decision mesora pa prolonga e ciere cu 3 luna mas.

Cada biaha lo prolonga esaki cu 3 luna pa asina por sigui vigila e situacion, Premier Wever-Croes a indica.

Ta e decision corecto pa Aruba aworaki, a remarca. A haya peticion di algun persona cu kier bay bishita algun familiar, bay Venezuela pa docter. A haya peticion tambe di esnan cu ta importa fruta y berdura.

Gobierno a considera tur e peticionnan aki, a señala. “Pero na e momentonan aki pa Aruba ta mihor pa e fronteranan keda cera. Ya caba tin cu atende cu e impacto di e crisis manera cu e ta awor mes cu e frontera ta cera.

Tin mas cu 2 mil persona a pidi asilo. Tin mas di 10 mil persona sin status legal na Aruba procedente di Venezuela. Tin cu atende cu esey prome cu dicidi di habri e frontera, e mandatario a remarca.

POSICION DI HULANDA

Esey ta e posicion di Aruba y pa loke ta Hulanda, a agrega cu tabata tin bishita recientemente di e embahador di Reino na Caracas. Hulanda ta pidi pa cuminza papia cu Venezuela pa habri e frontera.

Hulanda ta di opinion cu no ta den guera cu e pais y no por keda cu e frontera cera indefinidamente, Wever-Croes a indica.

Den cuadro di esey ta purba di splica Hulanda cu aworaki caba e situacion ta dificil pero Aruba ta dispuesto pa scucha kico ta e condicionnan cu nan lo por pone ariba mesa y ta papiando cu nan tambe, a agrega.

Pa Aruba e posicion ta cu e frontera ta keda cera pa tres luna mas pa e loke ta e frontera cu avion (priva y comercial) y barconan di fruta, transporte maritimo. Cada dia ta keda evalua e posibilidadnan. “Pero e situacion ta hopi dificil”, Prome Minister Evelyn Wever-Croes a reitera.

CONDICIONNAN

Si Venezuela no tin control na su fronteranan no por pidi Aruba pa habri e frontera pasobra nan no ta yudando den esaki. Esey mester ta un di e condicionnan cu mester bin ariba mesa, a agrega.

“Bo tin cu duna mi e pilar economico bek, bisa CITGO firma pa caba, duna mi tur cos pa nos por habri e refineria bek pasobra e ora tin un desaroyo economico na Aruba y ta yuda nos mes incluyendo e 10 mil y pico persona cu a bin di nacionalidad venezolano cu ta na Aruba y tal vez hasta e 2 mil y pico cu a pidi asilo”, e mandatario a indica.

Na e momentonan aki esey ta bira dificil. Tin mas condicion cu lo bin ariba mesa y cu no a cuminsa papia ariba dje ainda, pero un di e condicionnan lo ta cu si un barco mester bin y tin hende cu ta purba drenta Aruba na un forma ilegal, e areglo ta stop inmediatamente y ta cera e frontera bek, a subraya.

Un otro condicion ta si ta bay importa fruta y berdura for di Venezuela kier ta sigur cu e calidad ta bon y apto pa consumo.

Ainda tin mas condicion segun Premier Wever-Croes, pero si ta yega asina leu un dia e ora lo tin hopi condicion ariba mesa.

- Advertisement -

DUNA COMENTARIO

Please enter your comment!
Please enter your name here