Home General AZV ta trapa riba bienestar y progreso San Nicolas

AZV ta trapa riba bienestar y progreso San Nicolas

210
0
SHARE
- Advertisement -

Analisis

Ta bira tempo pa AZV realisa cu el a wordo introduci na Aruba pa sirbi e interes di e comunidad y di tur ciudadano.

Na momento cu AZV a bira realidad, contra boluntad di hopi Arubiano, e derecho democratico di ciudadanonan di Aruba a wordo poni un banda y e Arubiano a wordo forsa di ta parti di AZV cu a destrui e mercado local di seguro medico.

E Arubiano a haya su mes forsa di bira parti di AZV, cu sigur durante su prome añanan di existencia, a pone hopi Arubiano na careda pa haya e cuido cu nan mester.

Ciudadanonan di Aruba a wordo obliga di ta parti di AZV cu nunca a wordo obliga di duna Aruba loke Aruba merece y a bira un poder, cu hopi ta lamenta te awe.

Ta bira tempo pues pa AZV realisa cu el a wordo introduci pa miho servicio y si esey no ta posibel, Parlamento di Aruba mester discuti si pueblo di Aruba ta haya e placa cu e ta hinca den AZV na forma di servicio.

E ultimo decision di AZV pa cera porta di su oficina na San Nicolas, atrobe ta duna prueba u AZV falta nocion di loke Aruba mester.

Algun luna pasa, nos a aplaudi e forma cu San Nicolas a uni pa asina traha riba un futuro nobo pa e parti di Aruba, cu for di salida di Lago a sufri hopi.

E concentracion di atencion tabata pa un gran parti pafo di San Nicolas, cu sigur despues di e chasco di Citgo den cual votadonan di San Nicolas a wordo manipula, merece atencion awor.

AZV no por bay contra bienestar di San Nicolas cu den e plannan actual pa haya un base di prosperidad atrobe, ta haya un prueba con halto AZV ta pone e parti pariba di brug di Aruba riba su mapa y pio ainda con AZV ta tene cuenta cu loke ta bon pa e Arubiano.

E oficina di AZV na San Nicolas sigur mester duna servicio na e ciudadanonan cu no por wordo condena na cubri un distancia largo pa atende cu AZV.

E decision di AZV mester wordo rechasa y ta bira tempo pa pueblo cu ta obliga pa paga pa mantene AZV na bida, tene tur factornan importante di pueblo na bista.

Mester tin un oficina di AZV pariba di brug. Kico lo pasa si tur oficina di gobierno y empresanan na San Nicolas cera nan porta? Ki balor AZV ta duna na Arubiano, cu no por sigui bira victima di loke AZV dicidi?

Ta bira tempo pa Parlamento evalua AZV den cuadro di derechonan democratico na Aruba cu ya a wordo kibra ora a habri AZV y a obliga Arubianonan di ta sigura na AZV y e clase di servicio cu e kier duna cu placa di pueblo.

Sector medico cu instancianan manera AZV na cabes, mester cuminsa honra nan luga den e comunidad cu ta paga caro pa un sistema democratico cu a wordo masacra y a bira motibo di peso den e cartera di e Arubiano.

- Advertisement -

DUNA COMENTARIO

Please enter your comment!
Please enter your name here