Home Editorial Bon Pasco Aruba!

Bon Pasco Aruba!

48
0
SHARE
- Advertisement -

Editorial

Segun e calendario mas uza na mundo, ta 2019 aña pasa, cu Hesus a nace na Bethlehem. Cientificonan a bay investiga e fecha exacto y ta pone na duda si no tabata algun aña prome basa riba e sucesonan cu e Evangelionan den Bijbel ta presenta. Pa loke ta trata e dia exacto tambe tin algun discusion si 25 di december ta e fecha exacto.

Awe nos no kier atende e margennan di diferencia di fecha. Nos kier profundisa riba loke ta e punto di union di Cristianismo, cu ta su motibo di existencia. E no ta basa riba un fecha, pero riba un teoria moral di bida cu ta splica un comunidad kico ta bon y kico ta malo den bista di Dios.

Hesus ta papia di Dios como e Creador di hende, cu mester maneha e resto di creacion cu lo a sirbi bienestar di hende.

E forma cu hende mester maneha mundo y henter creacion, ta basa riba tres palabra. “Fe, speransa y caridad” ta e berdad Cristian cu ta alcansa tur parti di mundo, na tur idioma pa tur rasa y nacionalidad.

Awe, Aruba un pais di fe grandi den Dios, ta traha riba solucionnan pa problema serio. Ta a base di su fe, Aruba ta carga e speransa cu e ta logra y Aruba lo tin un futuro bunita. Pa e futuro aki ta carga cu bunitesa, mester di caridad pa nos comunidad funciona.

Caridad ta hiba nos na e concepto di Cristianismo cu ta presente den e palabra Arubianismo.

Arubianonan stima nan pais. Arubianonan stima otro. Arubianonan ta yuda otro. Arubianonan ta cordial. Ora tin problema financiero, Arubianonan ta sostene otro.

E Arubiano cu tin hopi placa, ta duna e Arubiano cu tin nada. E Arubiano cu ta gosa di un bon salud, ta duna asistencia na e enfermo. E Arubiano cu ta pasa den un tempo di problema, ta haya yudansa.

Den tempo di crisis semper Arubianonan a sostene otro. Un Pasco bunita tabata na 1985, ora Lago a cera y hopi hende a bira poder.  Arubianonan a yuda otro celebra Pasco.

Fe, speransa y caridad. Tres palabra den cual e pakete moral di Aruba ta sconde y ta haya un motibo riba dia di Pasco ora nos recorda nacemento di Hesus y di Cristianismo.

Ta den Luz di Pasco awe nos ta expresa e deseo, pa hunto nos ban lucha pa sobrevivencia di e moral Arubano, e moral di fe, speransa y caridad.

Ta den e Luz di Pasco, DIARIO, e matutino di Aruba,  ta desea e pueblo Arubano un Bon Pasco, yena cu Bendicion!

- Advertisement -

DUNA COMENTARIO

Please enter your comment!
Please enter your name here