Home Policial Boto cu 35 stranhero ilegal a wordo gara prome cu a yega...

Boto cu 35 stranhero ilegal a wordo gara prome cu a yega Aruba

179
0
SHARE
- Advertisement -

ORANJESTAD (AAN): Henter Guardacosta di Caribe Hulandes ta den extra vigilancia e dianan aki.  Tur ‘return’ di marine-radar ta wordo observa detayadamente, y constantemente tin tanto Helicopter y tambe e avion Dash-8 ta bulando riba Aruba, Bonaire, y Curacao.

Diaranzon dos siman pasa (20 di November), e helicopter NH-90 di e barco Zr.Ms. Groningen a detecta un boto sospechoso rumbo pa Curacao.  Mesora nan a manda un speedboat tipo Metal Shark pa asina stop e boto.  A bin haya un total di 44 Venezolano ilegal riba dje.

Diadomingo siman pasa (27 di November), ta cu e avion Dash-8 nan a bin detecta un otro boto yegando Curacao.  Y e anochi ey un biaha mas Metal Shark a drenta den accion y gara esaki.  Abordo tabatin 42 stranhero ilegal, di cual 29 homber y 13 muher.

Awor riba Diadomingo 1 di December den oranan di madruga, un unidad di Guardacosta di Caribe Hulandes a bin nota un boto ta nabegando direccion di Aruba.  Mesora nan a bay riba dje.

Ora cu Guardacosta a yega riba e boto, mesora a obliga nan para.  E boto tabata pata-pata di hende.  En total 35 stranhero ilegal.  Bao di guia a trece nan pa e waf mas cercano, cu ta esun di Playa.

Aki nan tur a wordo pasa pa Polis, cu na su turno a entrega cada uno na Warda Nos Costa pa interogacion y procesamento.

E boto tambe a wordo confisca door di autoridad local.

Pues pa e dianan aki, e control di Guardacosta di Caribe Hulandes riba lama ta sigui, pasobra nan ta notando un ‘spike’ e dianan aki di cantidad di stranhero buscando forma pa drenta e islanan ilegalmente.

- Advertisement -

DUNA COMENTARIO

Please enter your comment!
Please enter your name here