Home Turismo Bucuti y Tara a logra obtene e re-certificacion rigoroso di Green Globe

Bucuti y Tara a logra obtene e re-certificacion rigoroso di Green Globe

17
0
SHARE
- Advertisement -

ORANJESTAD (AAN): E resortnan Bucuti y Tara Beach Reosrt, a caba di logra haya re-certificacion di Green Globe, cu ta representa e standard internacional pa sostenibilidad.

E prome Hotel di Caribe cu ta carbon-neutral, a logra su di 19 certificacion di Green Globe via di nan dedicacion continuo pa suministra un vacacion memorable cu ta simultaneamente sostenible.  Na aña 2016, Green Globe a otorga na Bucuti y Tara e status nobo di Platinum y a yama e hotel na Aruba como “The World’s Most Sustainable Hotel/Resort”.

“Bucuti y Tara Beach Resort ta sigui di ta un ehemplo briyante di sostenibilidad den henter e region,” ta loke K. Denahe Hinds, LEED AP, y e Auditor Acredita di Green Globe cu a efectua e re-certificacion anual di Bucuti y Tara.

“Nan operacion standard ta encera respet pa medio ambiente y responsabilidad, encurashando otronan cu ta traha na e Hotel pa ta parti di e solucion, naturalmente.  Huespednan cu ta keda na e resort, tambe ta contribui na standardnan di medio ambiente sin compromiso.  Nan dedicacion di hopi tempo pa sostenibilidad via di nan participacion den e programa Green Globe, y otro certificacion notable ta pone nan aparte.  Luchando continuamente pa mehora aña tras aña den nan logronan di sostenibilidad, nan premio di Green Globe Re-certificacion ta nifica nan exito.”

“Green Globe ta e eco standard original pa turismo, cu ta loke e otro organizacionnan di certificacion ta respeta y trata di emula,” ta loke Ewald Biemans di Bucuti y Tara Beach Resort a laga sa.  “Bucuti y Tara ta orguyoso di ta sigui cumpli cu e standardnan stringente di sostenibilidad impone door di Green Globe, probando asina cu ora bo haci viahe e por ta satisfactorio y tambe responsable.”

E re-certificacion di Green Globe ta finaliza un aña di logronan grandi di sostenibilidad pa Bucuti y Tara.  Na April, e resort a haya e premio yama “Tourism for Tomorrow Climate Action Award” di World Travel & Tourism Council.

Ora e tabata eynan, Biemans a presenta con Bucuti y Tara ta riba e ruta pa bira carbon neutral na e Cumbre Global, cu tabatin ex-Presidente Barack Obama di Merca como orador principal.

Na Juni, Biemans a bira e prome individuo cu a ser instala den e Hall of Fame Award for Best Practice for Environmental Sustainability di Caribbean Hotel and Tourism Association.

E siguiente luna, Bucuti y Tara a logra e premio “National Energy Globe Award”, cu ta algo cu nan a haya un aña prome caba.

 

- Advertisement -

DUNA COMENTARIO

Please enter your comment!
Please enter your name here