Home General Caso Tjon/AVP a start e aña cu e mucha envolvi a nace

Caso Tjon/AVP a start e aña cu e mucha envolvi a nace

965
1
SHARE
- Advertisement -

Den porta di eleccion un inocente a bira victima den publicidad 

  • Base di caso segun documentonan diferente for di publicacion
  • Caso di custodia na 2007 y relacion mayornan baby den politica 

ORANJESTAD(AAN)– Den e edicion di Diamars 3 di December 2019, DIARIO a protesta contra e forma cu un mucha ta bira victima di un pelea politico.

E ponencia di DIARIO ta basa riba investigacion y e forma cu e caso a drenta noticia riba un plataforma politico, cu ta crea impresion cu ta cumpli cu un panorama pa pone husticia na duda.

E prome pregunta ta nace, si henter e discusion actual mester a drenta mundo politico ya cu ta trata di un tema sumamente personal pa tur envolvi. Por papia di creacion di un drama no solamente rond di e figura di Rocco Tjon, pero pio ainda di tur miembro di famianan cu ta wordo lastra den un caso cu ta cuminsa cu custodia di un baby.

E documentonan cu Corte mester haci publico, no ta revela nomber ni dia di nacemento di e personanan envolvi. E storia legal ta cuminsa na 2007 cu nacemento di un baby di un mama y un tata cu no ta wordo menciona na nan nomber den e casonan civil cu ta start na e aña cu e mucha ta nace.

Na 2007 diferente areglo ta wordo tuma entre mama y tata di e baby y e informacionnan ta mustra den direccion di custodia, pues e persona of personanan cu ta sirbi como voogd di e mucha.

Den e sentencia di Hues di 26 di maart 2013, por topa cu cantidad di informacion cu ta duna un impresion cu e mucha no a nace den un “hogar” en todo caso. For di momento cu tuma nota di e informacionnan di casonan den Corte na 2007, e pregunta ta surgi si e informacionnan sumamente personal, nunca mester a mira publicidad y pio ainda un scandal.

Si e mucha a nace na 2007, ta papia aki di un baby pa cual ta regla custodia y kende su bida ta wordo mara na regla.

Nomber di e mucha, e mama y tata no conoci den e documentonan cu mester bira base pa custumber huridico, (hurisprudencia) manera e ta wordo yama den circulo profesional.

Aspectonan personal di e mama y tata ta bini dilanti den e sentencia di 26 di maart 2013, cu ta seis aña despues cu e mucha a nace y den cual Tjon ta reclama pa e tambe tin custodia di su yiu.

E caso aki pues mester ta despues di e sonoro caso di peticion pa persecucion penal contra Tjon, cu e mama a pidi na 2010 y cu Corte a rechasa manera Tjon mes a mustra cu e informacion oficial di e sentencia cu el a uza pa contesta e acusacionnan di AVP. E tempo pues e mucha mester tabata tin 3 aña.

Ya na 2010 por mira un secuencia di casonan den Corte cu ta culmina na 2013, ora pidi pa e tambe fungi como voogd di e mucha y pa e mama tene su persona na haltura di loke ta pasa cu e mucha.

Tjon ta pidi tambe pa hunto cu profesionalnan, e por crea un relacion personal nobo cu su yiu.

Den e sentencia di Hues na 2013 ta bini dilanti cu Tjon a casa y tin dos otro yiu como parti di su famia nobo.

Hues ta basa su mes riba e relacion entre Tjon y e mama di e criatura. E relacion ta sumamente malo y e mama no ta confia Tjon. Hues no ta mira un forma con por bini cambio den e actitud di e mama cu tin custodia di e mucha, cu ta biba cerca e mama pues.

A base di e actitud di e mama Hues no ta mira con e mama y Tjon por comparti custodia di e yiu, loke segun e documento Tjon tambe ta comprende.

Pues den e sentencia Hues no ta bay di acuerdo pa Tjon comparti custodia pero si ta exigi e mama pa tene Tjon informa di su yiu.

Pa Tjon e parti aki ta importante, manera e sentencia ta trece dilanti, pasobra asina e criatura ta mira cu e no a wordo bandona dor di su tata.

Tanto Tjon como mama di e criatura mester a paga nan propio gastonan den Corte.

Manera DIARIO a señala den e caso aki, un criatura for di su nacemento, ta den un situacion di discusion legal pa ora e storia conclui, na 2017 e wordo uza como un arma contra su tata politico dor di AVP, contrincante politico di Rocco Tjon.

- Advertisement -

1 COMMENT

  1. Poloticonan no tin desencia . E caso aki ta algo priva no pa eordo lastra di e forma aki. Laga esunan cu ta liber di pica tira e prome piedra. Asina Jesus a bisa e multitud. Wak den boso mes un cura. Balki y splinter. Esaki ta yuda hiba Aruba dilanti? Foei. Foei y mas foei

DUNA COMENTARIO

Please enter your comment!
Please enter your name here