Home General Corendon Mangrove Beach Resort lo bira e hotel mas grandi di Corsow

Corendon Mangrove Beach Resort lo bira e hotel mas grandi di Corsow

114
0
SHARE
- Advertisement -

Prome fase ta premira pa habri na April 2020

ORANJESTAD (AAN):  Un otro desaroyo hotelero cu ta tumando lugar na Corsow ta esun di Corendon Mangrove Beach Resort.

Durante un bishita na Corsow, un grupo di prensa di Aruba a haya oportunidad di haci un ‘site inspection’ den e lugar unda e resort ta wordo construi. E proyecto, den su prome fase ta premira pa habri dia 1 di April 2020, asina Miguel Perret-Gentil, PR & Communications Manager a duna di conoce.

Corendon Mangrove Beach Resort lo ta un resort ‘All-Inclusive’ 5 strea y ta ubica na Pater Euwensweg, na Willemstad, tegenover di e hospital nobo.

E prome fase lo consisti di 381 camber. 3 edificio (un edificio nobo di 7 piso unda antes tabata tin Denny’s), 18 suites, cu facilidadnan manera cuatro pool, nuebe restaurant, puntonan di benta y barnan, un water park y tres sala di reunion.

Perret-Gentil a conta DIARIO cu e proyecto ta wordo realiza den dos fase. E prome fase ta wordo construi actualmente unda Veneto Holiday Beach tabata ubica, y na e tereno banda di dje.

DIARIO a haya sa cu pa e realizacion di e Fase uno, aproximadamente 250 empleado local ta involucra den tur e facetanan di e construccion.

Den e di dos fase, lo construi 450 camber adicional, mas pool, mas restaurants cu un beach club y un beach nobo. E fase dos lo keda cla na 2021.

E resort ‘all inclusive’ cu mas di 800 camber lo rekeri un inversion di aproximadamente 100 miyon dolar.

Algo masha interesante ta cu e hotel tambe kier contribui na duna oportunidadnan profesional na e hobennan local cu e obhetivo pa nan haya experiencia laboral y impulsa e sector turistico na Corsow.

E compleho ta wordo ehecuta pa e compania local Corendon Curacao Holding B.V.,  cu ta forma parti di Corendon Hotels & Resorts, perteneciente na e Grupo Corendon cu sede na Hulanda.

 

- Advertisement -

DUNA COMENTARIO

Please enter your comment!
Please enter your name here