Home Policial Desgracia pisa riba Green Corridor ora auto a bolter

Desgracia pisa riba Green Corridor ora auto a bolter

892
0
SHARE
- Advertisement -

Un persona a keda pega den auto y otro benta ariba caminda

ORANJESTAD  (AAN): Riba caminda di Green Corridor, na altura di Sero Tijshi, direccion Playa, a sosode un accidente basta pisa diahuebs merdia.

Polis, Brandweer y Ambulans a presenta na e lugar pa atende cu e desgracia. E melding a drenta mas o menos 1’or di atardi y asina tur e team di emergencia a dirigi na Sero Tijshi pa atende cu e victimanan.

Eynan a topa cu un Hyundai i10 cora cu number A-44753 cu tres persona aden, esta e chauffeur maculino y dos pasahero femenino.  Posiblemente debi cu wiel a rementa, e vehiculo na un forma inespera a hala banda robez, dal den e berm y sero di santo mey-mey di caminda, y posteriormente bolter na un forma violento.

Durante e boltermento aki, un pasahero femenino a wordo saca di e vehiculo y el a cay banda panort di caminda.  E auto finalmente a keda cu su cuatro wielnan na halto como 40 meter mas pabao.

Un di e pasaheronan femenino a logra sali riba su propio forza y tabata cana rond.  Pero e chauffeur masculino a haya golpi pisa, y el a keda pega den e vehiculo.

A manda busca Vehiculo di Rescate di Cuerpo di Bombero pa yuda sake.  Tres unidad di Ambulans tambe a yega, incluyendo Officier van Dienst cu a coordina full e trabao.  Un funcionario di Ambulans a gatia y drenta den e auto y a keda monitor signonan vital di e victima den e vehiculo.

A tarda un rato pa asina personal di Ambulans y Brandweer por a saca e persona for di e auto, sake for di e situacion cu e tabata aden, ya cu su mannan tabata bao di e auto.

E trabao desplega a bay bon y cu coordinacion di Ambulans a logra saca e victima y wordo transporta pa Dr. Horacio Oduber Hospital y e otro persona cu tabata benta ariba caminda tambe a wordo estabiliza  pa despues hib’e hospital.

Cuerpo di Polis y nan departamento tecnico a cuminza haci nan investigacion pa asina determina kico tabata e causa di e  accidente.

Actualmente, tin hopi hende cu facilmente ta core ariba highway na un velocidad masha halto mes, siendo cu e maximo velocidad ta 80 kilometer pa ora.

Pesey e suplica di Cuerpo di Polis pa den e dianan aki di fiesta cumpli cu e reglanan di trafico y si ta bebe no stuur, y si ta stuur pa no bebe.

Den e caso aki, investigacion lo determina kico precis tabata e causa di e desgracia, asina vocero di Polis, Lito Lacle a duna di conoce.

Informe te ora di ciere di edicion ta mustra cu e chauffeur ta keda hospitaliza, y a haya sa cu e dama cu a wordo saca y cay banda panort di caminda, ta den estado critico.

 

- Advertisement -

DUNA COMENTARIO

Please enter your comment!
Please enter your name here