Home arte y espectaculo Diadomingo awor tin concierto Dominical Donny Lacle     

Diadomingo awor tin concierto Dominical Donny Lacle     

12
0
SHARE
- Advertisement -

ORANJESTAD (AAN): Comision Organizado di e Concierto Dominical Donny Laclé ta invita tur hende pa e ultimo concierto pa aña 2019. Esaki lo tuma luga diadomingo awor, dia 8 di december, na Biblioteca Nacional Aruba den George Madurostraat.

Un biaha mas e comision a logra hinca un programa atractivo y varia den otro, e biaha aki cu un ambiente di Pasco y Fin di Aña. Tin tres grupo cu lo percura pa e ambiente aki.

E concierto ta habri cu Coro Ars Nova cu ta bou di direccion di señora Mayra Kock-Garrido. E coro aki a caba di participa na e di III Festival Internacional “Voces Unidas” na Bogotá, Colombia, cu a tuma luna di 13 pa 17 di november ultimo. Tabata un exito rotundo y un bunita experiencia pa e cantantenan. Y esey kiermen cu nan ta canta un parti di e repertorio cu nan a presenta na e festival. Banda di e coro, lo canta tambe e duo Elizabeth Pope y Mephyr Arrindell y e solista Clyde Milliard.

Tambe lo presenta diadomingo awor e grupo hubenil Melodia cu ta bou di direccion di Rubin Ponson. Den e 8 añanan di su existencia Grupo Melodia a cosecha masha exito, specialmente pa e harmonia musical cu e hobennan aki ta demostra durante nan presentacion. Grupo Melodia ta drentando su di nuebe temporada di fin di aña.

E di tres presentacion ta bou di direccion di Carlos Bislip. Su banda ta consisti di un tremendo grupo di musico hoben. E hobennan aki ta Justin Flores (baho), Alejandro Gonzalez (piano), Stephen Diaz (drums), Denzil Tromp (percusion), Alexander Nicolaas (percusion) y Ivan Williams (drums).

Ta interesante pa menciona, cu tur e hobennan di e banda aki a yega di ricibi un beca di Fundacion Pa Talento Musical Donny Laclé. E banda ta compaña e cantantenan Osdelly Wester, Solaica Clarinda y Tabitha Smith Heemstad, cu lo impresiona cu nan tremendo bos. Carlos mes ta toca vibrafon. E repertorio ta cantica di Pasco den e genero di Jazz. Na final nan ta toca un “Christmas Parang” cu no ta Jazz, sino musica folklor cu ta origina di Venezuela y Trinidad.

Un momento importante den e concierto di diadomingo awor ta ora ta entrega oficialmente beca pa estudio musical na diferente talento hoben. E sosten aki ta posibel cu e donacion cu e publico presente ta haci tur luna pa medio di e famoso caha di glas. P’esey for di awor ta gradici tur nos fiel bishitantenan pa nan aporte boluntario.

E concierto aki ta priminti di bira hopi interesante y bunita, pues, reserva bo diadomingo mainta. Entrada ta gratis, pero manera semper ta pidi un contribucion boluntario pa den nos ultimo concierto di aña por otorga beca na algun di nos hobennan talentoso.

Sea asina bon di bini trempan, pa haya un bon luga pa sinta y pa no perde nada di e concierto aki. E concierto ta cuminsa 11.00 am en punto y ta dura te 1.00 pm, y tur hende ta bonbini.

 

- Advertisement -

DUNA COMENTARIO

Please enter your comment!
Please enter your name here