Home Hudicial Diez aña di prison exigi pa homber cu a cap homber mata...

Diez aña di prison exigi pa homber cu a cap homber mata na San Nicolas

308
1
SHARE
- Advertisement -

E sospechoso a expresa cu e no ta accepta cu a abusa di su yiu muher

ORANJESTAD (AAN): E Dominicano Franklin Sanchez di 51 aña di edad, Diabierna mainta a scucha Fiscal exigi 10 aña di prison pa a kap Marlon Stennett na su pia cu consecuencia cu e victima a muri.

Franklin Sanchez a bisa Hues cu el a perde cabez ora el a tende di su señora cu nan yiu muher a bisa cu “su amigo Marlon Stennett” a laga su tata, esta Marvin Stennett viol’e mientras e tabata para mira.

Franklin a bisa Hues cu e no ta acepta cu Marvin Stennett ta abusa di su yiu muher. El a bay na e cas di Marvin y a warda te ora cu Marlon a yega. El a ataca Marlon di lomba y a kap e na su pia. Marlon a muri di sangramento door cu Franklin a corta dos ader di su pia.

Diabierna mainta den sala di Corte por a mira cu miembronan di CEA a tuma medida di seguridad. A laga e tata di e victima, Marvin Stennett, sinta leu for di Franklin. Ta asina cu Marvin Stennett tambe mester a presenta dilanti Hues pa un serie di caso di abuso, entre otro e lamentable caso di e yiu muher di Franklin Sanchez.

Fiscal a bisa cu e acusacion contra Franklin ta cu riba Diahuebs 30 Mei 2019, el a mata Marlon Stennett. Fiscal a bisa cu Franklin a kap Marlon cu machete cu consecuencia cu el a muri. Fiscal ta considera esaki asesinato.

Den sala di Corte tabata presente señora di Franklin kende tabata acompaña pa un psycologo cu a keda sinta banda di dje.

    KAP CU MACHETE MATA:

Hues a mustra cu Franklin a kap Marlon cu machete na su pia. Franklin a pidi disculpa pa loke a sosode. El a bisa Hues cu hopi Dominicano sa cu e ta un persona di trabao. Pero loke a sosode cu su yiu muher y su señora, a pone cu el a actua asina. El a bisa Hues cu el a tende gritonan di su señora el a bisa su yiu homber pa tene su mama pa asina e bisti su paña.

Franklin tabata drumi den su camber y a spierta door di e gritamento. Ora el a tende kico a sosode cu su yiu muher, el a bay kap Marlon na su pia pero segun Franklin nunca cu intension tabata di mata. E mes a bay entrega su mes na Polis.

Franklin a bisa Hues cu ta na Polis el a worde informa cu el a mata Marlon. Franklin a bisa Hues cu nunca e tabatin problema cu husticia y nunca su intension tabata pa mata sino corta. Franklin basta emociona a bisa Hues cu ta hende a bay haci problema na su cas.

El a bisa Hues cu Marlon a abusa di su yiu muher y su intension tabata pa bay haci’e cu e otronan. El a bisa cu como tata e tabata un momento hopi dificil.

   AMIGO TA LAGA SU TATA VIOLA SU AMIGA:

Hues a bisa cu e señora di Franklin a bisa cu e yiu muher a yega cas tur emociona y bisa cu el a worde viola e anochi anterior door di e tata di su amigo Marlon y cu autorizacion di su amigo Marlon kende a para mira con su tata a abusa di dje.

Franklin a bisa Hues cu el a worde educa cu hopi principio y respet. El a enfatisa cu e no ta acepta e forma con Marvin a abusa di su yiu muher. El a bisa Hues cu si Marvin a bay cu su yiu Marlon den e lugarnan di prostitucion ta su asunto pero no cu su yiu muher.

   TATA A PERDE CABEZ Y KAP CU MACHETE:

Hues a puntra Franklin kico a pasa cu el a coy e machete. Segun Franklin el a coy e machete cu e ta usa pa cultivacion di mata, hinca den un saco y sali bay for di cas y bay na cas di Marlon. El a bisa Hues cu e no sa mes kico e tabata haci. El a perde cabez ora e como tata ta tende di su señora kico a pasa cu su yiu muher.

Franklin a bay na e cas di e victima y a keda warda, te ora cu e victima a yega cas. El a ataca Marlon di lomba y kap e cu machete na su pia. E victima Marlon a sali core y Franklin su tras. Ora Marlon a cay abao un hende den un Van chikito a coy Marlon y hib’e promer auxilio. Pa ora cu a yega promer auxilio, Marlon ya a fayece door di sangramento.

   PASA VIDEO DI E KAPMENTO:

Hues a bisa cu Franklin a kap Marlon net bao di su rudia. Hues a bisa cu tin video di loke a sosode y a pensa di no pasa e video riba screen grandi pasobra e tata di e victima ta presente. Por a nota cu e caso aki a afecta Franklin hopi. E tabata hopi tristo.

E tata di Marlon, Marvin mes a pidi pa e sali for di sala di Corte un rato. Riba e video por a mira con Franklin a ataca Marlon cu e machete. Mientras cu tabata pasa e video di seguridad di un botica, Franklin cu cabez abao tabata sacudi cabez y bisa Hues cu e no tabatin intension di mata.

Fiscal a remarca cu tin un momento cu por mira cu Franklin a zwaai den direccion di e curpa di Marlon. A bolbe pasa e video y enberdad ta mira Franklin ta haci un movecion. Franklin a bisa Hues cu el a lanta e machete pero a zwaai un vez so na e pia di Marlon.

Hues a bisa cu riba e video por mira cu Franklin pa di dos biaha tabata bayendo abao cu e machete. Hues kier sa kico Franklin kier a haci di dos biaha. Tin indicacion cu e lo kier a corta garganta di e victima. Franklin a bisa cu esey no ta asina.

   TATA DI VICTIMA MENAZA FAMIA:

Franklin a bisa Hues cu ora e por a haya bishita na KIA, su señora a bis’e cu Marvin a bay na su cas y a bisa su señora pa sali pafor. Franklin den Corte a bisa Hues cu si algo mester pasa su famia, ta Marvin ta responsabel. E tabata mustra cu su dede den direccion di Marvin.

Fiscal a bisa cu mas o menos 3’or di marduga Franklin a sali for di e cas y te 6’or di mainta e kapmento a sosode. E kier sa kico a pasa den e periodo aki. Franklin a bisa cu el a sali bay cana y a bay warda te ora cu tin hende na e cas. El a pensa cu Marvin lo tabata na e cas.

El a expresa pakico Marvin ta bay mete cu su famia si nunca el a haci nada malo cu Marvin. Fiscal a puntra Franklin pakico ora su señora a bis’e kico a pasa cu nan yiu, pakico e no a bay Polis.

Franklin a bisa cu ta hopi tristo cu hende grandi ta abusa di bo yiu y ta mira esun culpable ta haci manera nada a pasa. Esaki ta inacceptable p’e. E momento ey e no tabata por a pensa.

   DEMANDA DI DAÑO:

Marvin a haci demanda di gasto di entiero y daño inmaterial. En total di entiero ta suma 9.630 Florin. Inmaterial el a exigi mas cu 36 mil Florin.

Hues a bisa cu psycologo ta haya F.S. culpable.

    EXIGENCIA DI FISCAL:

Fiscal a bisa cu e ta haya legalmente proba cu Franklin a kap Marlon cu machete. El a bisa cu e video di seguridad di un botica ta mustra claramente con Franklin a ataca Marlon di lomba ora cu Marlon a bay habri porta di cas. El a kap cu forza na altura di rudia di Marlon, kende a core bay y a fayece. Tin dos testigo a mira con Franklin a core bay riba Marlon y kap cu forza.

Patologo a constata cu door di e kap hopi hundo bao rudia, a corta addernan cu a causa cu Marlon a muri. Fiscal a bisa cu Frankilin a bisa cu e tabata kier duna Marlon un les y no tabata su intension di mat’e.

Na opinion di Fiscal, aki por papia cu Franklin a mata Marlon y no asesinato. El a zwaai cu hopi forza cu machete di 48 cm.

Fiscal a bisa cu e por compronde e rabia cu Franklin a haya ora el a tende kico a sosode cu su yiu muher. Sinembargo Fiscal ta haya cu Franklin no a busca pa sa kico realmente a pasa. E ta haya cu Franklin mester a bay Polis pa laga haci investigacion. Franklin a tuma ley den su man y esey na opinion di Fiscal ta absolutamente no aceptable.

   CASTIGO:

Fiscal a mustra riba dos sentencia di casonan na Aruba di hincamento, caminda un a haya 10 aña y e otro 11 aña di prison. El a bisa cu e ta tene cuenta cu Franklin a entrega su mes y a coopera cu investigacion. Tambe cu Franklin a mustra di ta arepenti di loke a sosode. Fiscal a exigi 10 aña di prison.

Pa loke ta demanda di daño, 9.600 Florin di entiero ta aceptabel pero no e inmaterial. El a pidi pa declara e parti inmaterial no admisibel. Fiscal a bisa cu no por papia di defensa propio sino mas bien un venganza.

   DEFENSA:

Abogado mr. Canwood a bisa Hues cu Franklin a admiti di loke el a haci. Sinembargo e ta haya cu no mester perde for di bista e circunstancia cu a pone Franklin a haci asina. Como tata di e yiu muher cu a worde abusa, el a actua asina. El a dal Marlon un biaha so cu machete y despues el a bay entrega su mes.

E abogado a bisa Hues cu Franklin a bira emocional ora el a tende di su señora cu su yiu muher a worde viola door di tata di e amigo di su yiu y cu autorizacion di e amigo di su yiu. Franklin no ta duda den su yiu muher. Franklin a perde cabez y te cu awe e yiu muher ta bao tratamento di psycologo.

E abogado a bisa Hues cu no tabata Franklin su intension di mata Marlon. El a dal un biaha so. Si realmente e tabata kier a mata, e lo a sigui dal cu e machete, cual no ta asina. El a haci un movecion pa dal di dos biaha pero no a sigui cu esaki. No por papia di asesinato pasobra e no tabatin plan pa asesina y tampoco premedita. E abogado ta haya cu aki por papia di defensa propio. Franklin a dal na e pia no cu intension di mata. Na opinion di e abogado, aparentemente door cu Marlon a core bay y e amigonan a hink’e den auto pero no a bay di biaha promer auxilio, el a fayece. E ta kere cu aki por papia di a maltrata cu machete no cu intension di mata.

El a menciona sentencia caminda e persona a haya 10 luna di prison. E abogado ta haya cu loke a sosode no a shock comunidad. Ningun hende ta tuma Franklin na malo di loke a sosode. El a pidi Hues pa duna Franklin castigo igual na loke el a sinta caba. E abogado a remarca cu no por compara e caso aki cu esnan cu Fiscal ta menciona.

E circumstancia di Franklin ta completamente diferente cu esnan cu Fiscal ta menciona. E abogado ta haya cu mester rechaza e demanda di daño. E ta haya cu ta mucho compleho pa Hues bay dicidi. E ta kere mas mihor mester haci un caso civil.

Hues a sera tratamento di e caso y a bisa 3 Januari 2020 pa 8:15 am lo tin sentencia.

- Advertisement -

1 COMMENT

  1. No ta bon pa mata, period, pero, no ta bon pa hende falta respet na hende muher, y den e dianan ey cu e caso aki a sosode, tabatin por lo menos un caso di violashon, y of acto di pedofilia tumando lugar, tabata dianan druk, y tur hende kier cuida nan famia. Y kiko husticia ta hasi, ora entrega un keho di abuso sexual? E meneer aki a tuma husticia den su man door cu husticia na Aruba ta suck. Ta parse cu cada salta un cas tin un caso di of abuso sexual of pedofilia.

DUNA COMENTARIO

Please enter your comment!
Please enter your name here