Home Editorial E orguyo y alegria di ta Arubiano ta e bendicion di fin...

E orguyo y alegria di ta Arubiano ta e bendicion di fin di aña

65
0
SHARE
- Advertisement -

Editorial

Misa di Aurora, koornan cu ta prepara pa e Ora Solem, guitara, acordeon y fio cu ta cuminsa resona, e holo di cushina, e aroma di kerstboom. Negoshinan ta planea reunionnan cu nan trahado pa Pasco y cambio di aña. Amigonan ta lubida cualkier problema y cu Dande ta bolbe na porta di otro .

Aruba ta bisti su trahe di fiesta pa prepara pa Pasco. Aruba no ta cualkier pais. Un isla chikito manera su himno mes ta bisa, pero yena cu tradicionnan cu ta haci su cultura un boter di e champagne mas exkisito pa celebra e bendicion di ta Arubiano.

Aruba semper tabata un famia cu su propio custumbernan, cu a atrae turistanan cu kier gosa di e sabor tipico di e pais unico na mundo.

Aruba ta prepara pa Pasco den cual rico y pober ta trata segun nan forsa pa gosa di e celebracion cu ta uni Arubianonan den sentimentonan bunita di union y patriotismo. E Arubiano stima su luga, su Aruba, su dushi tera cu el a crea a lo largo di su historia y caminda e ta sinti su mes na cas.

Ta dificil pa topa cu e ambiente Arubano na otro parti di mundo. E ambiente di Caya Grandi, yena cu luz y hende cu ta topa otro, ta brasa otro atrobe, ta bati bleki, ta hari y ta gosa.

Negoshinan tambe ta bisti di gala pa yuda entrega Aruba e temporada di alegria, durante cual e pais ta relaha, pa por acepta un cargamento nobo di forsa spiritual, emocional, humano, pa e por enfrenta e aña nobo y tur loke e por trece.

E fe di e Arubiano ta e conductor principal di e caracter di e pueblo cu kier su ratonan trankil y e alegre pa como famia celebra su dianan di fiesta.

E Arubiano ta hende di famia, di amistad, di cordialidad, di union cu ta bini dilanti den un comunidad carga cu speransa na e momentonan mas dificil y cu un animo cu ta kibra e influencia negativo cu ta stroba un pueblo alcansa horizonte nobo manera Aruba a demostra cu su Status Aparte.

Aruba, nos dushi patria, nos union di Arubiano, di hende cu sentimentonan noble. E Aruba aki nos ta pinta awe como nos tarheta di Pasco cu nos ta manda pa Aruba. Nos ta celebra Aruba, como Arubiano cu un curason y alma Arubano cu nada por kibra.

Nos ta reta 2020 cu nos Dande pa plama bendicion riba nos isla. Nos ta Arubiano, un pueblo cu Dios a bendiciona.

Ta cu e sentimento aki nos ta enfrenta e ultimo weekend prome cu Pasco 2019 y cu e sentimento aki nos ta invita tur Arubiano pa cende e Luz di Paz, di bon boluntad y di alegria Arubano den nos curason.

- Advertisement -

DUNA COMENTARIO

Please enter your comment!
Please enter your name here