Home Deporte E tata den deporte Francisco “Chipen” Chirino a bay laga nos

E tata den deporte Francisco “Chipen” Chirino a bay laga nos

188
0
SHARE
- Advertisement -

Parlamentario Endy Croes:

Diaranson  27 di November den oranan di anochi Francisco “ Chipen” Chirino a bira malo y a bay laga nos. Chipen of “Chipi” manera nos ta yame ta un tata den deporte aki na Aruba pero alaves a traha den diferente directivanan internacional di softball. Presidente di Aruba Softball Bond Endy Croes ta comenta  cu desde diahuebs mainta  personalmente El a ricibi yamada di Presidentenan di Federacionnan di Softball  di rond mundo entre otro di Panama, Colombia, Venezuela, Bahamas, Argentina, Puerto Rico , Republica Dominicana, Brasil,  pa nombra algun expresando nan sentido di pesame na familiares di Chipen  y e perdida cu e mundo di softball a hiba.

Esaki ta ilustra e aprecio pa Chipen su trabnounan Internacional.Chipen na un edad di 84 aña a bay laga nos.  Endy Croes ta conta cu Chipen no solamente tabata su mentor y consehero pero Chipen ta manera un Tata Pe. Endy su famia su juinan sin excepcion, su rumannan  hunto  Mama Sofia   tin un stimacion  hopi profundo pa Chipen y ultimo 15 añanan Chipen tabata manera un Tata pa tur.

Chipen pa un tempo a retira completo for di softball despues cu el a sirbi softball pa mas di 30 aña.  Desde 2004 Endy Croes hunto cu un grupo di amigo amantenan di softball competitivo a acerca Chipen na su cas pidiendo Chipen pa duna un man bek pa yuda lanta softball fastpitch bek cual deporte porcierto e tempo ey tabata tin alrededor di 10 aña sin draai.

Asina a lanta na 2004 “Comision Pro Softball Organisa”. Akinan e amistad mas profundo  a inicia cual a comberti su mes den un relacion como famia di un tata y un jui. Endy Croes ta conta con el a biaha masha hopi lugar cu Chipen kende tabata goza di un respet internacional sin igual y a habri practicamente tur porta internacional pa su persona.

Chipen ta miembro activo ainda den ECASC, CONCACAS y CONSURSA . Desde 2004 te cu 2019 sin excepsion di ningun aña a organisa campeonatonan local tanto masculino como femenino. Desde 2010 Endy Croes y Chipen a drenta bek directiva di Aruba Softball Bond y a continua na  desaroya nos atletanan. Selecionnan a cuminsa competi internacional  atrobe.  Endy Croes  ta splika con na final di October recien ainda el a buska  Chipen pa bay  Pos Chiquito durante e ultimo wega esta final AA  Femenino sin nunca  por a pensa cu ta su ultimo wega di final cu Chipi  lo a presencia. October 2017 Endy cu Chipen a bay Botswana na Africa pa atende un Congreso Mundial di WBSC.

Banda di Deporte Chipen a sostenemi incondicional  momento cu  mi a wordo brinda e oportunidad pa subi e prestigioso lista di Movimiento Electoral di Pueblo na 2013. Hunto cu Chipen a bishita masha masha hopi cas tanto na 2013 y 2017. Chipen semper riba pia tabata yama mi tur pero tur dia pa nos sali campaña y mei mei di tur esaki traha tempo pa yama reunion di softball paso softball tambe mester sigui draai. Asina tin masha hopi historia skirbi awe di e “Legado  Francisco Chipen Chipi Chirino”.

Pa Diamars awor nos lo hiba Bo bo ultimo lugar di sosiego. Mi kier a gradici Bo imensamente pa tur lokual Bo a significa pami y henter mi famia. Softball ta perde un baluarte. Royal Power y Selecionnan lo haña Bo falta.

Bo a laga nos cu un bashi hopi grandi pero na mesun momento nos Consuela ta cu Bo lo tin un bon lugar serca Papa Dios. Danki Chipen.  Danki Chipen.  Terminando  cu e cancion cu Royal Power a composita pa Bo “ Chipen nos ta Stimabo”.

- Advertisement -

DUNA COMENTARIO

Please enter your comment!
Please enter your name here