Home Hudicial Exigencia 3 y 4 aña prison pa grupo traficando 30 kg. cocaina...

Exigencia 3 y 4 aña prison pa grupo traficando 30 kg. cocaina y 2 kg. di marihuana

143
0
SHARE
- Advertisement -

ORANJESTAD (AAN): E Colombiano di inicial A.T.S., e Venezolanonan di inicial P.J.H., C.G.R., D.F. y e Arubianonan di inicial R.S. y A.N.B., a presenta dilanti Hues pa e caso penal cu Ministerio Publico a cuminsa contra nan. Fiscal a acusa nan di posecion di cocaina y violacion di ley di droga door di prepara traficacion di droga cocaina y marihuana.

Tambe cu nan ta forma parti di un organizacion criminal entre 15 April 2019 y 19 Mei 2019. R.S., tambe ta worde acusa di traficacion di hende dia 19 Mei 2019. Fiscal a bias cu R.S. a pone disponibel cambernan y huur esakinan cu extranheronan ilegal pa gana placa.

Ta ser papia di transporta 16 kilo di cocaina y 4 kilo di marihuana y esakinan na un cas. Fiscal a bisa Hues cu e tabata pensa si por acusa nan di forma parti di organizacion criminal y ta haya cu mester declara nan liber pasobra no tin suficiente prueba manera ley ta exigi.

    DROGA:

Tabata meymey di luna di April 2019 informacion a drenta na servicio di inteligencia cu un lote grandi di droga lo bin Aruba for di Venezuela y cu P.J.H. y A.T.S. ta envolvi.

Asina autoridad local a cuminsa tap y scucha combersacion di cellular di A.T.S. y P.J.H. For di e scuchamento por a compronde cu droga a drenta 15 April 2019. A detene C.G.R. cu 16 kilo di cocaina. A haya e boto Spanishfly di A.N.B. cu un lote di 14 kilo di cocaina riba 19 Mei 2019. En total 30 kilo di cocaina y 4 kilo di marihuana a keda confisca.

Hues a mustra cu P.H. a bisa cu el a worde yama for di Venezuela y bisa pa tuma pakinan aki na Aruba. El a bisa cu el a haci e trabao pa haya placa. Segun P.H. e mester tuma e pakinan patras di airport. El a bisa cu el a haya un adres unda e mester busca e pakinan. Den auto el a hay’e 16 kilo di cocaina y 4 kilo di marihuana. E tabata den auto hunto cu C.G.R.

Segun P.H. e mester warda e pakinan. Hues a mustra cu segun D.F. y C.G.R., e pakinan di droga ta di P.H.   Pero e sospechoso P.H. ta nenga cu e droganan ta di dje.

Hues aki a mustra cu tin yamadanan scucha cu P.H. ta yama otronan y bisa cu tin cosnan ta yega y mester busca. Tur cos ta mustra cu 19 Mei 2019 esakinan a yega Aruba. Riba e dia ey P.H. a yama C.G.R. y C.G.R. a bisa cu “e cosnan a yega”.

Dia 15 Mei 2019, P.H. a yama A.T.S. y puntra si a papia cu e otronan pasobra “e cosnan a sali”. Segun P.H., e combersacion ey no tabata tocante droga sino porconan cu a worde manda for di Venezuela pa bende na Aruba.

A.T.S. a bisa Hues cu e no tin nada di haci cu e droganan. Hues a bisa cu D.F. a bisa Polis cu e droga ta di A.T.S. y P.H. Hues a puntra pakico P.H. y C.G.R. a hiba e droganan na su cas. Segun A.T.S. el a fia P.H. e auto y P.H. y C.G.R. a debolbe e auto.

Hues a mustra cu 17 Mei 2019, riba Whatsapp P.H. ta informa A.T.S. cu mayan “lo bay pisca” y diadomingo e lo ta na Aruba “cu e piscanan”.

Segun A.T.S., nan a papia di lobster y otro cosnan di laman cu P.H. ta trece. A.T.S. a bisa Hues cu e por a compronde cu un tal Jose na Venezuela debe P.H. placa y e unico manera cu Jose lo por paga ta door di manda pa P.H. un paki. C.G.R. a bisa cu el a yama P.H. pa e haya un liber di marihuana.

Hues a bisa cu den e auto a haya 4 paki di marihuana cu ta 4 kilo. C.G.R. a bisa cu el a haya un saco y ora el a habri esaki el a ripara cu ta 4 paki tin aden y nan a bis’e cu trankilo y cu despues lo papia. El a bisa cu el a worde deteni solamente cu e saco cu e 4 pakinan.

Hues a remarca cu D.F. tabata 2 siman na Aruba y tabata na e cas unda e boto Spanishfly tabata para. Dia 19 Mei 2019, el a bay den e boto pa saca e lote di cocaina di 14 kilo. Hues kier a sa si D.F. a bin Aruba ilegal pa e droga. Segun D.F. el a bin ilegal pa busca un mihor bida.

R.S. ta para riba cu e no tin nada di haci cu e lote di droga. Hues a bisa cu R.S. a papia cu A.N.B. pa bay pisca cu e boto riba 19 Mei 2019. Hues a mustra cu R.S. a declara cu riba laman a bin un boto y a laga un saco atras. Ta sospecha cu lo tin droga den e saco aki. Despues e ta declara cu ningun momento a bay riba laman pasobra e motornan ta daña. Hues a remarca cu Polis ta conclui cu e motornan tabata traha y a haya 14 kilo di cocaina den e boto.

   HUUR CAMBER:

R.S. a bisa cu e tabata yuda extranhero cu camber pero no tabata cobra huur. El a bisa cu ta hendenan cu constantemente tabata bin y bay back Venezuela. Door cu frontera a sera nan no por a bay back y nan a keda den camber. Hues a bisa cu un di e ilegalnan a bisa cu desde December 2018 e ta na Aruba y a keda 15 dia cerca R.S.. Un otro a bisa cu e tin 8 luna ilegal na Aruba y a bin cu boto. El a bisa cu e tabata keda eynan y tabata paga 200 Florin pa luna.

Un otro cu tambe tabata keda 9 luna ilegal a bisa cu e tabata paga pa coriente. Segun R.S. e conoce e homber ilegal y a yud’e. Hues a remarca cu si 10 hende ta kedando eynan y si nan ta paga 200 Florin esey ta suma 2000 Florin pa luna. Segun R.S., nan a yuda pa paga e gastonan. El a bisa cu e no tabata gana placa cu esaki y tabata yuda a base humanitario.

A.N.B. cu ta doño di e boto pero e boto ta riba nomber di su partner. Segun A.N.B. e motor di e boto tabata daña y e boto tabata pasa awa. Hopi hende tabata traha riba e boto. E no sa nada di e pakinan di droga. Hues a puntra si ta e hendenan desconoci a pone e lote di droga den su boto. Segun A.N.B. esey ta corecto.

   EXIGENCIA FISCAL:

Fiscal a bisa Hues cu e ta haya legalmente proba cu e grupo aki ta envolvi den traficacion di droga. El a exigi 3 aña di prison pa D.F., 3 aña y 6 luna pa P.J.H., R.S., C.G.R., A.T.S. y 4 aña pa A.N.B.

Hues despues di a scucha defensa di e abogadonan a bisa cu e ta bay studia e caso y 20 December 2019 lo tin sentencia.

- Advertisement -

DUNA COMENTARIO

Please enter your comment!
Please enter your name here