Home General FHMD den cooperacion grandi cu HIAS pa yuda migrantenan den crisis di...

FHMD den cooperacion grandi cu HIAS pa yuda migrantenan den crisis di violencia domestico

115
0
SHARE
- Advertisement -

ORANJESTAD (AAN): E campaña anual di conscientisacion riba violencia domestico Orange The World 2019 di Fundacion Pa Hende Muhe den Dificultad ta finalisando nan 16 dia di activismo y conscientisacion por medio di diferente charla y actividad educativo.

Awor cu 1 aña den cooperacion grandi cu organisacion internacional HIAS (Hebrew Immigrant Aid Society), e trabaonan ta sigui pa trece tur organisacion cu ta trata cu e problema aki riba mesun liña den e lucha contra violencia domestico riba nos isla.

‘Si 1 den cada 3 hende muhe ta experiencia violencia domestico, kiermen nos tur conoce un victima’, asina orador internacional Heather Cole, consultante internacional riba violencia contra hende muhe y mucha muhe, a expresa durante un lectura publico cu a wordo organisa na EPI Collegezaal riba 4 di December.

Esaki tabata un dialogo publico tocante Violencia domestico pa hende local, migrante, refugiado, hende homber y hende muhe, por medio di HIAS, FHMD, IOM & UNHCR.  HIAS ta un organisacion cu ta trata cu asuntonan di refugiado, y den e caso aki na Aruba nos no ta reconoce refugiado. Sinembargo, no por descarta cu tin migrantenan, hende homber y hende muhe, cu ta bini nos isla y haya nan cu problema di violencia domestico.

“Nos no ta haci distinccion ni di rasa, di color of nacionalidad, ni con bo status social ta tampoco. Pa nos ta importante pa bo haya ayudo si bo ta den un crisis,” Magaly Maduro, coordinador di Fundacion Pa Hende Muhe Den Dificultad ta bisa.

E trabao primordial di e fundacion ta pa yuda hende den crisis, y HIAS ta awor yuda hopi cu e parti di e migrantenan. “Nan a pidi nos pa nos expertisio, pues nos a haci un jointventure cu nan.

Nan tambe kier conscientisa nan grupo cu no mester tuma e cosnan aki pasobra bo ta den posicion menos bon. Cu tin instancia, tin profesionalnan y tin caminda pa bo bay, p’esey e colaboracion aki ta esencial”, sra. Maduro ta comenta.

No ta pasobra bo papelnan no ta na ordo por ehempel, kiermen cu bo derechonan humano mester wordo pisotea, pues e colaboracion aki sigur ta uno hopi importante basa riba e punto aki. 

Nos tur tin un responsabilidad
Heather Cole ta un consultante for di Inglatera cu ta traha cu victimanan den casonan humanitario.

Diaranson na EPI Collegezaal el a duna un tremendo splicacion y bay den dialogo cu e publico riba diferente punto importante pa tene na cuenta cu ne.

Sra. Cole a bin combersa riba con violencia domestico ta e forma di violencia mas significante contra hende muhe y mucha muhe na mundo, na unda cu 1 den cada 3 hende muhe lo experiencia esaki den nan bida.

“Nos tabata papiando con nos por haci manera amigonan, coleganan of familiarnan di hende muhe, pa yuda nan y sostene nan, pa reduci e isolacion, y con pa no contribui mas na nan problemanan”, sra. Cole ta comenta.

E experto ta bisa cu si nos di berdad ta stima e hende muhenan den nos bida, y si nos di berdad ta worry pa e hende muhenan rond mundo, pa haci nos sociedadnan y comunidadnan mas safe, nos tur tin un responsabilidad pa pone atencion. “Y nos tur tin un responsabilidad pa puntra e hende muhe kico nos por haci pa yuda nan”, sra. Cole ta expresa.

Tin di menciona cu tabata hopi bunita tambe pa mira un hende homber cu tabata den publico e anochi aki, scuchando cu hopi atencion, y haciendo pregunta na sra. Cole riba ki conseho e por tin pa un amiga di dje cu ta pasando den un situacion fastioso y abusivo den su relacion.

“E dama aki tin un tremendo amigo cu ta pone atencion riba e cosnan aki, esey ta hopi bon”, sra. Cole a remarka prome cu duna su contesta y conseho na e meneer presente. Un anochi di dialogo sigur informativo pa tur esnan cu tabata presente.

Exhibicion di Arte pa recauda fondo
Riba e di cinco dia di locual ta e 16 dia di activismo y conscientisacion, FHMD a tene un apertura di Orange The World Art Exhibition & Silent Auction.

E meta tras di esaki ta pa recauda fondo pa proyectonan di e fundacion cu ta bini na 2020, manera tambe pa hiba conscientisacion y activismo contra violencia contra hende muhe y mucha muhe den e hogarnan di nos comunidad.

Bo por bishita #OrangeTheWorld Art Exhibition & Silent Auction
situa na e segundo piso di Baz-RRR Galleria na Oranjestad.

Bo ta simplemente bishita Baz-RRR Galleria & Brasserie entre 10am-6pm, kies bo obra faborito, pone bo bid silencioso. E Art Exhibition & Silent Auction ta te cu 10 di December 2019.

 

- Advertisement -

DUNA COMENTARIO

Please enter your comment!
Please enter your name here