Gerencia di ATA a nenga sinta cu STA pa finaliza e CAO pero a manipula su trahadornan

    199
    0
    SHARE
    - Advertisement -

    Diego de Cuba ta lamenta:

    ORANJESTAD (AAN) – Gerencia di ATA a nenga di sinta hunto cu Sindicato di Trahadornan di Aruba (STA) pa finaliza e contrato colectivo, y esaki ta di lamenta, sr. Diego de Cuba, lider sindical, a señala den entrevista cu DIARIO.

    Locual e Gerencia di ATA a haci ta acerca e trahadornan individualmente, y forza nan cu un documento y firme cu fecha 29 di November, 2019, nan tur lo ricibi 1.200 florin di bonus extra. STA a desaconseha pa haci esaki.

    No obstante, sr. de Cuba a expresa, cada persona sa su situacion financiero, y cada ken ta doño di su curpa y e tin entendi cu mayoria a bay di acuerdo pa firma dicho documento. Pa STA e espacio pa negocia pa e trahadornan aki ta keda hopi limita, mirando cu e mayoria a firma pa e tiki cu ATA a ofrece nan, y asina nan ta cera e espacio pa e sindicato bringa pa mas, pa nan, y e mediador a wordo informa caba.

    De Cuba a subraya cu anto laga ATA prepara e concepto di CAO manera nan a presente pa e trahadornan y na unda mayoria di nan a firma, y STA lo firme, pasobra no ta bal la pena pa sigui discuti riba algo cu ya e trahadornan a bay di acuerdo cune caba, aunke contra nan boluntad.

    E lider sindical a acentua cu STA ta spera tambe, cu Mediador a tuma bon nota di locual a pasa den e proceso aki, unda cu un doño di trabao ta bay negocia, individualmente, un contrato colectivo.

    “Si bo ta permiti esaki como Mediador di Gobierno y no ta pone e Gerencia para straight na nan lugar, yama nan y trece nan paden y bisa nan cu locual nan ta haciendo ta contra tur ley y etica, aunke a pidi tur trahador pa firma, esaki no ta e mihor manera”, Diego de Cuba a señala y a expresa cu ta tristo pa wak con e trahadornan ta wordo intimida cu si nan no firma, nan no ta haye. E ta mira esaki como un locura di otro mundo, pasobra si bo duna un bo tin cu duna tur!

    El a sigui bisa cu e hecho cu e trahadornan a firma pa STA ta cla y raspa, y e no ta di acuerdo cu esey y ta hala leu di dje. Locual e trahadornan a firma no ta ni 40% di locual STA tabata bringa pe, y cu e documento cu nan a firma nan a cera e caminda pa sindicato STA sigui bringa pasobra e gerencia di ATA ta mustra cu e trahadornan ta contento cu e contrato chiripero cu nan a firma.

    E documento cu e trahadornan a firma ta bay te 2022, kiermen cu nan mes a horca nan curpa, segun Diego de Cuba. STA ta respeta nan decision, y lo firma e CAO conforme loke nan a firma, y historia ta caba!

    - Advertisement -

    DUNA COMENTARIO

    Please enter your comment!
    Please enter your name here