Home Editorial Habri frontera cu Venezuela lo ta decision fatal contra Aruba

Habri frontera cu Venezuela lo ta decision fatal contra Aruba

171
0
SHARE
- Advertisement -

Editorial

E decision di Prome Ministro Evelyn Wever-Croes pa tene e frontera cu Venezuela cera, ta sostene e bienestar y siguridad di Aruba cu ta su tarea como gobernante.

Na varios ocasion DIARIO a expresa su mes riba e tema aki pa conclui cu no tin ningun motibo valido pa habri e frontera entre Aruba y e cuna di peligro cu Venezuela ta pa Aruba.

E situacion actual di Aruba ta prueba con importante ta, pa un Prome Ministro tene bienestar di e pais na prome luga ora e ta tuma decision.

Si e relacion Venezuela y Aruba tabata contene un grado halto di riesgo pa Aruba for di momento cu Venezuela a bira satelite di Cuba y Rusia den man di regimennan Chavista, awe ta zona hasta ridiculo pa papia riba apertura di e frontera entre Aruba y un pais cu dos presidente y un situacion caotico riba tur tereno.

Ta fuera di tur proporcion pa trata na uza consumo di fruta y e prijs di fruta pa exigi Prome Ministro Wever-Croes habri porta pa peligernan grandi y fatal pa Aruba.

Pa demostra cu nos ta papia cu prueba na man, awe DIARIO lo presenta cifranan cu ta mustra e luga di fruta den e totalidad di alimento y bebida na Aruba. Mester tene cuenta cu den e cifranan aki tin tambe e consumo di fruta for di turistanan cu un sistema diferente di alimentacion diario.

Ademas e total di fruta cu barco ta trece, no ta refleha cierto tipo di fruta cu Aruba ta cumpra na supermercadonan. Mas bien e fruta cu barconan ta trece ta fruta, cu Aruba mes por produci y cu ta cay bou fruta tropical.

Tin otro forma pa Aruba come fruta na cantidad manera e kier. LVV Santa Rosa a papia di e proyecto pa planta mata di fruta na luga di matanan cu ta muri den e clima di Aruba na e proyectonan di Bo Aruba.

LVV Santa Rosa ta duna guia na Arubianonan pa planta manera ta pasa na tur otro pais. Barco ta trece fruta manera patia, papaya y berdura manera pampuna cu Arubiano mes por planta sin problema. Nos no ta papia mes di bacoba y banana cu ta wordo uza hasta como adorno den cura.

Kico barconan por trece Aruba awor cu Aruba mes no por reemplasa? Ki riesgo Aruba ta core pa arma ilegal ta entre mercancia scondi cu ta drenta Aruba ora habri frontera cu Venezuela?

Ta bon pa Hulanda laga e decision di habri frontera pa Aruba y no bay intermedia pa habri porta pa mas hende bini Aruba cu mester cuminsa yuda su mes den e crisis cu Venezuela a crea pa Aruba. Hulanda ta prueba di loke por pasa cu un pais cu ta habri porta sin midi pa migracion.

DIARIO ta sostene Prome Ministro Wever-Croes completamente den su decision pa tene frontera entre Aruba y Venezuela cera. Nos ta sostene Aruba y e Arubiano na prome luga den un tempo cu Aruba mester ta na prome luga pa e por recupera di problemanan serio.

- Advertisement -

DUNA COMENTARIO

Please enter your comment!
Please enter your name here