Home arte y espectaculo “Hey… ta Pasco!” ta mas cu djis un concierto

“Hey… ta Pasco!” ta mas cu djis un concierto

50
0
SHARE
- Advertisement -

Alegrando curazon di nos grandinan…

ORANJESTAD (AAN):  Durante e ultimo dianan, cantante Edjean Semeleer a bishita casnan di cuido rond di nos isla, pa asina trece e calor di fin di aña mas cerca di nos grandinan, e klompinan di oro cu a traha duro pa nos por disfruta di e Aruba cu nos tin awe.

E artista a expresa cu esakinan ta presentacionnan hopi importante p’e, ya cu asina e por demostra na nan sikiera un poco di tur e amor, respet, cariño y balor cu nan merece.

E presentacionnan aki ta algo usual cu Edjean ta haci tur aña durante varios ocasion special pa 25 aña largo caba, pero e aña aki como parti importante di e proyecto “Hey… ta Pasco!” y tambe Edjean su celebracion di 25 aña den e fascinante mundo di farandula, e bishitanan a bira extra special.

Nos grandinan a expresa un gratitud y alegria inmenso na Edjean pa su bishita y presentacion musical dedica specialmente na nan y a haci peticion pa e sigui bishita nan manera custumber.

Durante e presentacionnan aki por a nota e impacto positivo cu musica tin riba e ser humano. Un alegria grandi tabata bisto riba e caranan di nos grandinan cu tabata canta den voz halto hunto cu Edjean. E bishitanan y presentacionnan aki lo sigui durante full e luna di december.

Empleadonan di e casnan di cuido aki tambe a expresa nan gratitud na Edjean pa e presentacionnan masha special aki y a expresa nan deseo pa sigui mir’e bishitando nan.

Un di e dianan masha special tambe lo ta diahuebs 19 di December mainta caminda cu Edjean y su gran orkesta y artistanan invita lo regala un concierto di Pasco na alumnonan di Maria School y tambe Colegio San Hose di Santa Cruz den e teatro di Ser’i Noka.

Apart di tur e presentacionnan special aki, nos ta na caminda tambe cu hopi entusiasmo pa e regreso di e gran concierto “Hey… ta Pasco!” cu tambe lo tuma lugar den e teatro historico y monumental di Ser’i Noka diahuebs anochi 19 di december.

Companianan local a mira hopi importancia y balor agrega di e proyecto “Hey… ta Pasco!”, e celebracion di Edjean su 25 añanan den farandula y tambe pasobra cu e proyecto aki ta un esfuerzo pa sigui cu e trabaonan di restauracion y renobacion di nos teatro di Ser’i Noka y pesey a dicidi di brinda nan maximo sosten pa e por ta un realidad. Incluyendo nos sister city cu ta Doral na Florida, via e organisacion OASCA (Oranjestad-Aruba Sister Cities Association).

Manera ya  a subraya recientemente, esaki ta sirbi como ehempel cu nos artistanan local tin un rol sumamente importante no solamente den uni, pero tambe pa inspira henter un comunidad.

E concierto aki ta dia 19 di december anochi 8’or den Ser’i Noka.

- Advertisement -

DUNA COMENTARIO

Please enter your comment!
Please enter your name here