Home General Minister a bin cu un memo recordatorio pa tur operador di transporte...

Minister a bin cu un memo recordatorio pa tur operador di transporte publico

267
0
SHARE
- Advertisement -

Riba loke nan vergunning ta stipula pa ley:

ORANJESTAD (AAN) – Theo Kock, funcionario di Departamento di Transporte Publico (DTP), a splica den un entrevista cu DIARIO, cu Minister di Transporte a saca un memo cu ta recorda kico ta e leynan cu tur hende cu tin vergunning pa opera transporte publico, tin cu cumpli cune.

Theo Kock a splica cu e memo ta splica kico ta stipula den e Landsverordening Personenvervoer y tambe den e Landsbesluit Personenvervoer (Decreto pa Transporte di Pasaheronan), cu ta stipula tanto e derechonan como e debernan di e usuario.

Ademas si e doño di e vergunning no cumpli cu locual ta stipula den e NV y den e LV, e minister tin hermentnan cu por uza pa e asuntonan aki cana corecto.

E intencion ta pa ningun hende tuma decisionnan pafo di e Landsverordening ni di e Landsbesluit pa no kibranta e leynan.

Esaki ta conta pa cada un di e diferente vergunning cu tin pa opera transporte publico, taxi, autobus, V-autonan, etc., etc. Y cu e memo aki cada persona cu tin vergunning sa kico e tin cu atene na dje.

Kock a duna como ehemplo, cu den e esaki ta defini kico e ruta di e autobusnan ta, pa no tin malinterpretacion manera prome cu e tabata hopi habri y cada ken tabata interpreta, por ehemplo, di unda pa unda e ruta di Oranjestad ta.

El a splica tambe, pa loke ta trata transporte di bishitante, cu den pasado e servicio di taxi tabata solamente pa recoge turistanan den e terminal di aeropuerto of crusero of hiba e bishitantenan di un lugar pa otro, pa un cierto suma.

Den e landsverordening ta para cu nan mester di un taxi meter, pero nunca esaki a wordo implementa. Hopi prome e tabata wordo uza, pero despues e diferente gobiernonan nunca a presiona pa esaki bin bek.

E taxi meter ta un control pa e taxistanan no desvia di locual nan tin cu cobra, sea di mas of di menos, sino cobra e tarifa stipula.

No obstante aplica e ley ta tuma su tempo ya cu gobierno tin su prioridadnan kizas mas urgente cu esaki, segun sr. Kock. E mes a manda un coreccion pa haci den e Landsverordening personalvervoer, pero esaki tambe ta tuma su tempo pa e pasa su caminda pa e yega asina leu di wordo aproba.

El a bisa tambe cu siman pasa e manda e memo pa tur stakeholders, pero ta un tiki dificil pa yega na tur di biaha. Pero si a duna e memo na esnan cu tin mas prioridad manera esnan cu ta core autobus y e taxinan.

DTP ta bezig partiendo e memo rond, y un cantidad considerable a wordo entrega caba. E idea ta pa den fin di siman tur operador di transporte publico tine.

Sr. Kock a reitera cu e memo aki ta un recordatorio di tur loke ta para den e vergunning cu ta wordo duna.  Pues no ta un maneho nobo cu minister a bin cune, pero pa corda nan riba cosnan cu kizas nan a lubida. Na final e mandatario ta recorda cu ora e persona ta comete un infraccion e ta haya un carta di advertencia e prome biaha.

Esaki por bay for di e keurins-card of e auto mes no ta na ordo, of e rijbewijis, of cu polis a para e chofer bao influencia, entre otro.

E di dos biaha e persona ta haya atrobe un carta pero e minister ta trek in e vergunning pa un periodo cu ainda mester wordo determina, y e di tres biaha cu comete un infraccion e minister por kita e vergunning definitivamente, y den futuro e no ta bin na remarca pa un nobo.

DPT, segun sr. Kock ta hayando hopi keho di usuarionan riba tur sorto di infraccion.

- Advertisement -

DUNA COMENTARIO

Please enter your comment!
Please enter your name here