Home Gobierno Otmar Oduber a despedi como Minister di Infrastructura y Medio Ambiente

Otmar Oduber a despedi como Minister di Infrastructura y Medio Ambiente

232
0
SHARE
- Advertisement -

ENTREVISTA EXCLUSIVO:

ORANJESTAD (AAN): Binti siete aña na total y 22 aña activo den mundo politico, pero awor a yega e momento pa emprende un rumbo nobo a base di un decision personal di bandona su posicion di Minister di Infrastructura y Medio Ambiente.

Ayera tabata e ultimo dia di Otmar Oduber den su pechi como minister. Durante un breakfast cu el a ofrece na prensa na Hilton Hotel, DIARIO a combersa cune y el a expresa kico ta su sentimentonan awor cu e ta retira.

“E sentimentonan ta mixto naturalmente, pero na momento cu mi tuma un decision y esey a caracteriza mi mes durante e 22 añanan activo den politica, tanto den mi funcionnan cu mi tabata tin e honor y privilegio di por ta miembro di Parlamento di e pais aki pa 8 aña y e ultimo 9 aña y mey, practicamente minister den dos cartera”, Oduber a manifesta.

El a agrega cu semper cu el a tuma un decision el a para pa e decision ey y den e caso aki a yega un punto cu “den mi bida personal, pa mi propio salud, pa mi famia y pa decisionnan personal, a yega na e decision aki  cu despues di 22 aña di dedicacion activo den politica, mi mes persona tin otro retonan aworakinan den bida, cu otro motibonan cu a mi a pone pa loke ta trata mi bida profesional” .

El a reitera cu ta bay ta un sentimento mixto pasobra desde cu el a termina su estudio practicamente esaki ta loke el a haci.

Otmar Oduber a considera cu esaki ta un momento adecuado. Aruba a pasa den diferente faceta. Tin un gobierno y un Prome Minister cu ta dedica y cu tin e amor y e curazon caminda cu e mester tin’e pa e comunidad.

Apesar cu e gobierno aki a inicia na un forma cu no tabata uno “natural”. Tres partido cu a bin hunto despues di un decision di comunidad di Aruba den un eleccion pa forma un gobierno. Awe ta sinta y a siña gana e respet di otro pa por traha pa e pais aki, a indica.

Kico tabata un di e retonan mas grandi den tur e añanan aki? “E reto mas grandi tur dia cu bo ta encontra ta e hecho cu bo mester a tuma decisionnan cu no ta acapara consecuencia pa abo so, pero pa henter un comunidad, henter un pueblo”.

Oduber ta di opinion cu pesey ta importante pa tuma e decisionnan ey na un forma responsabel. E ta contento cu el a asesora su mes semper, durante su carera, cu e personanan adecuado. Su team semper tabata critico y no hende cu tey pa duna elogio tur dia.

“Mi ta sumamente agradecido cu a base di e team ey, continuamente bo tin cu tuma decisionnan cu ta acapara un influencia riba e bida cotidiano di tur ciudadano cu ta biba na Aruba”, el a expresa.

Otmar Oduber tabata tin un carera sumamente activo y cu cambionan hopi grandi y cu un repercusion pa e decadanan benidero. El a laga sa cu e ta sinti su mes satisfecho di por bisa cu tabata decisionnan corecto y por mira nan den e diferente proyectonan cu ta wordo laga atras.

- Advertisement -

DUNA COMENTARIO

Please enter your comment!
Please enter your name here