Home Parlamento Parlamentario Shailliny Tromp-Lee a elabora riba e situacion deplorable di e veld...

Parlamentario Shailliny Tromp-Lee a elabora riba e situacion deplorable di e veld di Pos Chikito

78
0
SHARE
- Advertisement -

ORANJESTAD (AAN) – Parlamentario Shailliny Tromp-Lee di fraccion di MEP, a hiba palabra den conferencia di prensa Dialuna y su prome punto riba agenda ta deporte.

Manera ta conoci, sra. Tromp-Lee ta un persona hopi envolvi den deporte y door di esey e ta bishita e veldnan y ta conoce den ki situacion nan ta. Aworaki e ta bishita e facilidadnan riba diasabra tambe, y den e conferencia di prensa aki a referi specificamente na e veld di Pos Chikito.

Durante e ultimo siete simannan, e parlamentario tabata sinti un grado di iritacion hopi grandi, segun el a expresa. E motibo di esaki pasobra for di principio e tabata pidi hopi atencion pa e facilidadnan deportivo rond di Aruba, pero den e dos añanan cu a pasa caba nan ta keda deteriora.

E dama parlamentario a splica cu su grado di iritacion ta bisa cu a costa pueblo hopi placa pa traha e facilidadnan aki, cu a mustra cu nan tin un balor agrega y cu ta necesario pa e desaroyo deportivo di nos pueblo.

Facilidadnan cu ta wordo uza diariamente pa entrenamento y den fin di siman pa e competencianan.

Esaki ta rekeri di hopi placa cu di parti di gobierno e fondonan no tey, of no tin espacio pa haya nan. Ta despues di cada pasa un tempo ta bin fondonan disponible of ta mediante fundacionnan di gobierno cu por haci e proyectonan aki realidad.

Bolbiendo na e tema di e veld di Pos Chikito, cu Diadomingo e campeonato a termina, e parlamentario a ripara cu cada bez cu un fly bay den laira na parti patras, tur hende ta zak nan cabes abao pasobra nan ta ripara cu si e bala ta cay riba e dak un confetti di e zinc ta bin abao cu ta parti di e dak di e edificio.

E tribuna ta wordo mal mantene, den sentido cu tin hopi paloma y e stulnan aunke ta di beton, ta hopi vies cu sushi di paloma y esaki ta algo cu tambe mester haya atencion, pasobra ta parti di e atencion cu mester duna na e facilidad.

A bira ora pa realiza cu gobierno ta haci inversionnan pero cu e facilidad deportivo mester keda mantene durante su tempo, pasobra si no ta asina e ta rekeri di un inversion hopi mas grandi manera renova of benta abao traha di nobo.

E facilidad na Pos Chikito su dak di cada punta un parti a cay caba loke ta mustra cu e ta basta deteriora y cu e no por sigui asina mas.

E pregunta cu Parlamentario Tromp-Lee tin, ta si pa tiki tiki cuminza kita tur e partinan pa despues no tin dak mas riba e tribuna,  of si ta bay cuminza pone e placa disponible pa haci e mantencion necesario? Aki e parlamentario a elabora riba Lotto pa Deporte, y por lesa esaki den otro publicacion.

- Advertisement -

DUNA COMENTARIO

Please enter your comment!
Please enter your name here