Home Gobierno Renovacion di Pier na Spaans Lagoen a bira un realidad

Renovacion di Pier na Spaans Lagoen a bira un realidad

190
0
SHARE
- Advertisement -

ORANJESTAD (AAN):  Diabierna ultimo tabata tin algo pa celebra na Spaans Lagoen. Esaki tabata tin di haber cu e trabaonan di renovacion na e pier.

Pa e ocasion aki a conta cu presencia cu Minister Dangui Oduber, representantenan di Fundacion Centro di Pesca Hadicurari, di Ministerio di Agricultura, Cria y Pesca y tambe piscadornan.

Piscadornan sigur ta masha contento cu e restauracion cu a tuma lugar. Manera DIARIO a menciona den un articulo anterior, pa hopi tempo caba e pier aki no a wordo drecha y tabata representando un peliger pa motivo cu e structura tabata zak den otro na cierto partinan.

Awor por fin e renovacion a bira un realidad.

Presidente di Fundacion Centro di Pesca Hadicurari, Arthur Giel, a manifesta cu nan ta hopi contento cu den corto tempo un pier asina bunita a wordo caba.

El a gradici Minister Oduber pa e confianza poni den Fundacion Hadicurari y pa e team cu den tres siman a logra un pier completamente renova.

Tin diferente facilidad cu e pier por ofrece na e piscadornan, Giel a bisa, manera baño, mashin di ijs, awa, coriente. Pero tur esaki ta depende di e cooperacion di e piscadornan hunto cu e Fundacion.

Ta un tremendo proyecto a wordo haci y ta bay sigui haci mas. Banda di esaki a urgi gobierno pa e fundacion por haya de beheer di e centronan y e piernan pa por sigui aporta financieramente den dje for di Hadicurari, Arthur Giel a remarca.

Minister Dangui Oduber a indica cu e ta contento pa tabata tey presente pa e entrega oficial di e pier aki. Cuatro pa cinco siman pasa, a bisa, e tabata eynan pa anuncia cu a pone fondonan disponibel pa e ehecucion di e proyecto di renobacion aki cu tabata un necesidad.

Pa mas di 5 aña caba tabata tin e deseo pa gobierno yuda cu fondonan pa ehecuta y transforma e pier pa uzo di e piscadornan.

E mandatario a gradici Fundacion Centro di Pesca Hadicurari pa e cooperacion brinda y pa e contratista cu a percura pa den un tempo cortico entrega e pier, lag’e bunita y cu un calidad halto.

“Mi ta convenci cu e rancho aki na Spaans Lagoen sigur un dia por bira un atraccion turistico. Como Minister di Turismo mi kier a bisa tur e piscadornan cu nan por conta cu nos apoyo y mesun apoyo nan por conta cu tambe Ministerio di Transporte, Agricultura, Cria y Pesca pa asina nos sigui inverti den e pier aki pa haci mas y mas uzo di dje”, a expresa.

- Advertisement -

DUNA COMENTARIO

Please enter your comment!
Please enter your name here