Home Gobierno Tarifa di coriente na Aruba ta baha entrante 1 Januari 2020

Tarifa di coriente na Aruba ta baha entrante 1 Januari 2020

263
0
SHARE
- Advertisement -

Minister Evelyn Wever-Croes:

ORANJESTAD (AAN); Durante un conferencia di prensa extraordinario riba Diahuebs merdia, Gobierno a divulga un logro grandi na beneficio di comunidad, y cu sigur lo nifica bastante alivio pa e aña venidero.

Prome Ministro Evelyn Wever-Croes a revela un bon noticia, cual e Gobierno ta trahando pa basta tempo caba riba dje.  Diahuebs mainta e asunto a keda completamente cla, y algun ora despues a core yama un conferencia pa anuncia esaki.

“Nos ta bay baha e prijs di coriente entrante prome di Januari,” Prome Ministro Evelyn Wever-Croes a indica.  El a anuncia esaki den presencia di tur Ministro, y tambe director di Utilities Aruba NV, director interino di NV Elmar, y director di WEB Aruba NV.

Desde cu a asumi responsabilidad gubernamental, un punto di prioridad pa e Gobierno aki tabata di baha gasto unda ta necesario y unda cu ta posibel, incluyendo cerca tur Ministerio.

Aparentemente esey ta loke awor a wordo haci na WEB Aruba NV tambe.  Aki a logra di baha hopi gasto pa asina yuda reduci e tarifa cu e compania cu ta produci awa y electricidad por pasa esaki over pa NV Elmar.

Tabata Richard Eman di Utilities Aruba NV cu a revela cu nan a logra di cumpra (swap) suficiente HFO (Heavy Fuel Oil) na un prijs asina atractivo, y e ta suficiente pa wanta henter aña 2020.  Pues ni maske prijs di crudo subi drasticamente den 2020, e tarifa di coriente na Aruba lo keda abao.

Mientras cu otro islanan den Caribe ta aumentando nan tarifa di coriente, Aruba a demostra cu aki ta bahando esaki na beneficio di pueblo.

Tarifa di coriente ta baha entrante 1e di januari 2020 pa henter pueblo incluyendo comercio.  E ultimo biaha cu tarifa di coriente a yega di baha tabata 1 di Januari 2017, cu tabata aña di eleccion.

  TABLA DI REBAHO:

Habitantenan di Aruba cu tin coriente pa uso DOMESTICO, lo ricibi un rebaho como lo siguiente.

Esnan cu consumi 0 – 500 kWH lo ricibi un rebaho di 9.9%

Esnan cu consumi 500 kWH – 1000 kWH lo ricibi un rebaho di 10.4%

Esnan cu consumi riba 1000 kWH lo ricibi un rebaho di 8.4%

PA COMERCIO:

Chikito: lo conoce un reduccion di 7%

Grandi: manera hotelnan lo ricibi un reduccion di 7%

PA MISA, SCOLNAN, FUNDACIONNAN:

Lo haya un reduccion di 9%.

Esaki ta posibel despues cu dos aña largo a hiba un maneho financiero responsabel unda cu a mantene gastonan abou, unda cu no a desperdicia placa ni na fiesta ni derroche.

Tur esaki combina cu e decision di cumpra fuel oil pa na un prijs mas abou pa full 2020 (Swap) ta hacie posibel pa awe como Gobierno nos por anuncia cu coriente ta baha entrante 1e di januari 2020.

Cu e reduccion aki, esaki lo tin como consecuencia cu pueblo tin mas placa pa gasta, ta bay baha e “cost of doing business”, tambe baha costo di productonan, baha inflacion, y spaar divisas pasobra Aruba lo bay paga menos na fuel.

- Advertisement -

DUNA COMENTARIO

Please enter your comment!
Please enter your name here