Home General Tin dos caso den Corte contra gobierno entama pa pensionadonan publico

Tin dos caso den Corte contra gobierno entama pa pensionadonan publico

354
0
SHARE
- Advertisement -

Ivo Valdez, presidente di OPPA ta splica:

ORANJESTAD (AAN) – E Presidente di OPPA (Organizacion Pensionadonan Publico Aruba), Ivo Valdez, den entrevista cu DIARIO a referi na e falta di respet di gobierno pa e ciudadanonan aki, y a menciona cu tin dos caso den Corte, pa busca nan derecho.

Valdez a menciona cu hopi biaha OPPA a protesta pa medio di carta y di articulonan den corant, y tambe via entrevistanan na radio y television, pasobra OPPA no ta haya oido di e gobernantenan ni di instancianan cerca cual a trece su puntonan di preocupacion, y esaki a cuminza cansa OPPA y su miembronan.

Ivo Valdez ta corda cu na 2009 e gobierno anterior a tene un dialogo social den cual tur gremio a haya oportunidad di participa. E modelo cu nan a uza si nan lo a use bon, e pueblo por a participa den un democracia bibo, pasobra nan hunto cu e gobernantenan lo a dicidi con pa maneha e pais aki. Pero, lamentablemente, pa motibonan politico esey no a resulta bon.

OPPA ta cansa di un modelo cu nan ta yama “top down”. Valdez a subraya cu a bira tempo pa Aruba tin un democracia unda pueblo semper tin algo di bisa pa loke ta trata e maneho.

OPPA tin mas di 1600 miembro pensionado y refiriendo na actualmente, e ta señala cu no por laga un organizacion asina pafo di un dialogo, pasobra nan ta yame Dialogo Tripartite Social-Laboral. “Miho nan yame Dialogo Selectivo Tripartite Laboral, pasobra di social, e no tin nada”, Presidente di OPPA a bisa.

Biniendo bek na e dialogo di 2009, Valdez a menciona cu esaki a bay fout. Despues, na final di 2013 a bolbe tene un dialogo, lagando OPPA afo, y den e dialogo aki nan a tuma decision pa cambia e areglo di pension e tempo ey, di MPR 2011 pa MPR 2014.

Tambe nan a elimina e ahustacion di pension. Manera e ambtenaarnan tabata haya un ahuste riba nan salario, e pensionadonan tabata haye riba nan pension. Tambe esaki nan a elimina.

Ademas a elimina for di nan e bashi premie y e gelijkbedrag, pa tur e pensionadonan cu a baha cu pension for di 1 di Januari 2015. Esaki ta e consecuencia di e dialogo sin participacion di OPPA.

Aworaki gobierno tin dos caso contra dje. Uno ta e caso di ahuste di pension, cu ta e 85 florin cu e pensionadonan no a haya desde 2013 y tambe e grupo di Pensionado Uni, cu ta bringando nan caso di bashi premie y gelijkbedrag cu, recientemente, Huez a ordena gobierno di tuma un decision dentro di tres luna di tempo.

E caso pa ahuste di pension ta bin dilanti dia 15 di Januari. Valdez a indica cu den tur sentido e maneho di gobierno di un pais, directamente ta toca tur ciudadano, incluyendo e pensionadonan.

OPPA a manda carta di protesta pa e Minister di Asunto Social y Labor. Valdez a indica cu nan no ta haya contesta.

OPPA a protesta via radio, prensa y television pero no ta haya reaccion mientras cu gobierno tin un lema cu ta bisa cu hende ta central.

“Acaso nos pensionadonan no ta central? Nos no a hende? Nos tambe ta paga tur prima. Nos tambe ta paga belasting, y nos ta contribui grandemente financieramente, economicamente y socialmente y, no lubida, nos tambe ta haya bishita na cas durante e campaña caminda e politiconan ta pasa bisa bo cu nan ta bay goberna bo pais na un manera drechi, y soluciona tur bo problemanan pa despues ni un cita bo ta haya cu nan”, Ivo Valdez a subraya.

 

- Advertisement -

DUNA COMENTARIO

Please enter your comment!
Please enter your name here