Home General Wever-Croes ta paga debe nacional y alivia costo di bida

Wever-Croes ta paga debe nacional y alivia costo di bida

133
0
SHARE
- Advertisement -

Analisis

El a gara e toro na cacho y baha peso di prijs di coriente

*Prome Ministro ta frena aumento di prijs cu bon gobernacion

*Porta ta habri pa expande economia den tempo di crisis

Pa habri e columna di awe mester lanta para y regala Prome Ministro Evelyn Wever-Croes un aplauso mereci.

E herencia cu el a ricibi di gobierno anterior na 2017, a pone su persona lomba contra muraya.

Aruba a haya su mes confronta cu Reino, cu tabata tin tur rason ora a wordo constata cu durante 2009 pa 2017, Aruba no tabata capaz di hiba un bon maneho. e crisis cu Aruba mester a confronta na 2017, a papia pa su mes.

Aruba mester a tuma medida si Aruba kier sobrevivi e futuro mas cercano y tur loke mester bini. Na mes momento Aruba tin mester di mas tempo pa bandona e estado di ruina cu Citgo y mal gobernacion a laga atras y atrae companianan nobo pa Aruba.

Reino no por warda mas pa coregi e situacion financiero di Aruba cu ta practicamente bankroet dor di e maneho di gobierno anterior.

Prome Ministro Evelyn Wever-Croes a duna Aruba e garantia cu e ta saca Aruba for di e crisis pero na mes momento e ta duna Hulanda e garantia cu e ta soluciona e problemanan financiero cu ta exigi medida, cu ta afecta pueblo y economia.

Na momento cu Prome Ministro Evelyn Wever-Croes a trece e solucion dilanti ayera, gobernacion capaz di Aruba a marca un record nobo.

Gobierno Wever Croes, cu sosten di WEB productor di coriente na Aruba, a baha gasto di WEB, cu asina por a baha gasto di Elmar pa por a baha gasto di coriente cu ta e gasto mas pisa pa casnan, comercio y tur instancia na Aruba.

Coriente cada minuut ta afecta gastonan di pueblo. No ta trata solamente di luz. Prijs di coriente ta dicidi riba prijs di e cuminda cu nos ta come, e paña cu nos ta bisti, tur servicio cu nos ta ricibi.

Prijs di coriente ta afecta tur prijs den comercio y ta un di e motibonan mas grandi cu prijsnan ta subi y ta afecta e cartera di famianan, comercio y tur instancia.

Gobierno Wever-Croes a honra e palabracion cu na interes di Aruba el a haci cu Reino cu e lo baha gasto y aumenta entrada. Na mes momento el a honra su promesa na Aruba cu e lo tuma medida pa evita sufrimento di pueblo.

2020 lo nifica cu gasto di coriente lo baha considerablemente loke lo afecta tur prijs na Aruba. E costo di bida na Aruba ta wordo poni na un nivel nobo ora e Arubiano y empresanan mester paga menos pa coriente, loke lo baha gasto di tur empresa y di tur cas di famia, tur school y tur instancia.

E cifranan nobo lo permiti Arubianonan tene nan mes na balansa mientras gobierno di Aruba awor tin mas espacio pa atrae fuentenan nobo di entrada pa Aruba.

2020 ta bati na porta di un Aruba cu por hala rosea mas trankil. Awor ta keda na cada Arubiano pa duna nan sosten na e realisacion di un caminda nobo pa futuro renoba di Aruba.

Un aplauso tambe na dirigentenan di WEB, cu a mustra con un compania di estado ta sostene bienestar di un pais.

- Advertisement -

DUNA COMENTARIO

Please enter your comment!
Please enter your name here