Home Hudicial 2 aña di prison pa muher Mericano gara cu mas di 4.4...

2 aña di prison pa muher Mericano gara cu mas di 4.4 kilo di cocaina na aeropuerto

530
0
SHARE
- Advertisement -

ORANJESTAD (AAN) – Un muher Mericano S.C. gara na aeropuerto cu 4.4 kilo di cocaina pega na curpa ayera a wordo condena na 2 aña di prison. Ni Fiscal ni Hues no a kere S.C. su storia cu el a haya e pakinan den yierba y no tabata sa kico tin den nan.

EXPORTA COCAINA

Fiscal a acusa S.C. cu riba 7 Augustus 2019, el a exporta, tabatin hunto cun’e y a transporta 4453 gram di cocaina.

Hues a puntra S.C. si e acusacion ta corecto. Segun S.C. e no tabata sa cu e tabatin cocaina. Hues a bisa cu e raport di Polis ta mustra cu na aeropuerto S.C. a wordo deteni cu “body pack” yena cu droga. S.C. tabata kier a viaha pa New York.

Hues a mustra cu S.C. tabata bisti cu paña cu ta hala atencion. E paña tabata cu hopi flornan colorido. Ta asina cu miembronan di Douane na aeropuerto a investiga na curpa di S.C. y a haya 4 paki conteniendo substancia blanco. Investigacion a mustra cu ta cocaina. En total 4453 gram a keda confisca.

Durante interoga, S.C. a bisa na Polis cu diferente biaha el a bin Aruba. E biaha aki e mes a bin y el a haya e pakinan den mondi y a pega nan na su curpa. El a bisa cu e no tabata sa cu nan tabatin droga.

Hues a remarca pakico S.C. a pone esakinan na su curpa pa hiba New York. S.C. a bisa cu esey tabata su fayo. Fiscal a puntra pakico a usa bodypack. Segun S.C. el a usa esaki pa laga su curpa mustra mas bunita.

Hues a bisa cu S.C. ta traha den camber di operacion na Merca y tin tres yiu.

EXIGENCIA DI FISCAL

Fiscal ta haya legalmente proba cu S.C. tabatin “body pack” cu droga. Ta casi 4.5 kilo di cocaina a keda confisca. E ta haya cu S.C. a bin cu un storia cu e no ta kere. Fiscal a mustra cu e forma con S.C. tabatan duna contesta durante interogacion ta mustra cu e no kier coopera cu e investigacion. Fiscal a mustra tambe cu S.C. a bin Aruba diferente biaha. Fiscal ta considera S.C. un mula. For di e investigacion, no por a saca afor si S.C. a haya placa pa esaki. Fiscal a bisa Hues cu e no kier pa Aruba ta wordo usa como trampoline di droga pa Merca. El a exigi 24 luna di prison pa S.C. kitando e tempo cu e ta sera den KIA. Fiscal a pidi pa destrui e droga confisca.

ABOGADO

Abogado mr. Kip a bisa Hues cu e ta lamenta cu na ultimo ora o sea net promer cu tratamento di e caso, Fiscal ta duna resultado di investigacion di laboratorio. E abogado a remarca cu for di October 2019 e procesverbaal ta cla y nada a wordo haci. Door cu awor el a haya e resultado di laboratorio, e no a haya tempo pa papia cu su cliente riba esaki. Hues a duna e abogado tempo pa papia cu su cliente un rato. Despues e abogado a sigui mustra cu 7 Augustus 2019 ora cu S.C. a wordo deteni, el a bisa cu e kier asistencia di abogado promer cu e duna declaracion. Su siguiente dia, 8 Augustus 2019, e abogado a wordo notifica. E sospechoso a sinti cu el a wordo presiona. E abogado a reclama e hecho cu a interoga su cliente sin cu el a wordo pone na altura. Mas ainda Polis a bisa e sospechoso cu abogado a bisa pa dal bay cu e interogacion numa y cu e no ta bin. E abogado ta haya cu esey no ta corecto. El a bisa Hues cu e sospechoso a haya e pakinan den yierba ariba beach y no tabata sa kico tabatin den nan. Fiscal ta papia di mula pero video a mustra cu ningun hende a hib’e aeropuerto of tabata papia cun’e. E abogado a mustra riba circumstancianan personal cu e ta haya cu mester tene na cuenta. Segun e abogado, ta promer biaha cu S.C. a wordo deteni pa algo asina. A stroba su derecho fundamental pa haya asistencia adecuado di abogado. E tin tres yiu. Un di e yiunan a wordo viola y ta hopi depresivo cu chens di mata curpa. E hecho cu awor ta deteni na Aruba, ta hopi presion riba su yiunan. Su ruman muher ta atendiendo e yiunan. E yiu grandi awor ta den un institucion psychiatrico. E abogado ta di opinion cu e hecho cu S.C. tabatin un paña hopi colorido, ta mustra cu e no tabatin intension malo di transporta droga. Normal hendenan cu ta transporta ta bista paña pa hala menos atencion. Abogado a pidi Hues pa duna un castigo mas abou y si ta posibel igual na loke S.C. a sinta caba.

SENTENCIA

Hues a sera tratamento di e caso y a dicta sentencia di biaha. E ta haya legalmente proba cu intencionalmente S.C. a exporta droga. Hues a mustra cu S.C. mes a pega e pakinan na su curpa. Hues a bisa cu e tambe no ta kere e storia cu a haya e pakinan di droga den yierba y cu S.C. no tabata sa kico tin den nan. Pa cu e castigo, Hues a bisa cu e ta tene cuenta cu castigonan cu Hof ta duna. E cuestion di e yiunan, Hues ta haya cu S.C. a tuma riesgo cu e por cay sera y mester a pensa bon promer cu el a haci esaki. Hues a condena S.C. igual na exigencia di Fiscal, 24 luna di prison, kitando e tempo cu e ta sera den KIA. Hues tambe a duna orden pa destrui e droga.

 

- Advertisement -

DUNA COMENTARIO

Please enter your comment!
Please enter your name here