Home Editorial 2020 ta habri porta pa e decada di reto y cambio mundial

2020 ta habri porta pa e decada di reto y cambio mundial

153
0
SHARE
- Advertisement -

Editorial

Binti aña pasa, mundo a celebra entrada di Siglo 21 cu un ansha enorme. Tabata existi un panico enorme pa tur loke por a bay robes cu e base tecnologico cu hende a crea durante Siglo 20.

Nada a pasa y mundo cu alivio a sigui cana sin prepara su mes debidamente pa loke tabata exigi atencion.

Dos dia pasa, Aruba a despedi di 2019 y a drenta un decada nobo, cu ta habri porta pa retonan y cambio mundial grandi pa cual Aruba lamentablemente no a wordo prepara.

DIARIO durante e ultimo lunanan di 2019, a presenta na Aruba loke mester spera durante e decada 2020 pa 2030. Na mes momento nos a prepara nos mes tambe pa por cumpli cu nos deber sagrado di informa Aruba na e nivel mas halto.

Un bon gobernacion mester a guia Aruba na e futuro nobo. Mester di placa pa transforma e sistemanan basico di funcionamento di nos comunidad.

Pa por a confronta 2020, for di momento cu Aruba a bandona recesion na inicio di siglo, mester a cuminsa crea reservanan pa e pais.

2009 tabata di importancia crucial pa Aruba y mester a nifica introduccion di sistemanan adapta na e adelanto cientifico y e desaroyonan cu mester a sigui spera.

Ta e adelanto cientifico a haci cu hende ta alcansa un edad mas halto, loke ta nifica cu e comunidad ta cambia. E hende ta keda productivo na un edad mas halto aunke su gastonan pa entre otro salud, siguridad, bienestar general ta aumenta.

Antes school basico por tabata suficiente pa un hoben haya un trabou. Awor tur trabou ta exigi preparacion cu ta costa placa y ekipo di empresa y trahado.

E generacion cu awor ta retira, tabata pionero di un pais nobo, institutonan moderno y introduccion di e era di jet y tecnologia.

2020 ta habri un periodo di traspaso di trabou, comunidad y sistemanan cu a desaroya cu velocidad enorme.

Herencia mester wordo dividi den un generacion cu no necesariamente ta sigui e paso profesional hereda. Mundialmente e mundo empresarial y laboral ta cambia  mescos cu e ser humano y su ambiente.

Aruba a mara su mes pa uza e decada cu ta termina na 2030 na e esfuerso mundial di un mundo nobo a base di bon gobernacion, cu no a wordo hiba. No tin reserva financiero. No tin structura necesario ainda pa comercio ni mundo di trahado organisa.

Loke tin ta debe pa paga sin conocemento final di sumanan cu ainda mester paga durante e proximo tres decadanan.

DIARIO  a drenta 2020 cu optimismo pa motibo di e liderazgo demostra dor di gobierno Wever-Croes pa pone un base nobo y responsabel pa Aruba y cu e fe cu semper tabata parti di Aruba.

DIARIO lo ta critico pa e por sigui honra su deber di matutino di Pueblo di Aruba. Cu bienestar di Aruba nos dilanti, nos ta drenta 2020 y ta desea Aruba un decada cu lo hiba nos na un futuro di felicidad!

 

- Advertisement -

DUNA COMENTARIO

Please enter your comment!
Please enter your name here