Home Hudicial Abogado ta haya cu chauffeur di auto no ta complice di tiramento...

Abogado ta haya cu chauffeur di auto no ta complice di tiramento di Sky

731
0
SHARE
- Advertisement -

PG a pidi Hof pa mantene e castigo

ORANJESTAD (AAN): E homber Ronaldo Nortan di 19 aña di edad, ta sospecha di ta complice di a tira mata Hubert Arrindell (Sky).  El a presenta den Corte Superior pa e apelacion contra su sentencia di 4 aña di prison di cual 1 aña ta condicional.

Ta asina cu su abogado mr. Illes a apela e sentencia. E abogado a bisa Hof di Corte Superior cu e motibo cu a apela e sentencia ta pasobra cu e ta haya cu Nortan no ta complice. Tratamento di e caso aki a bay hunto cu esun di e muher hoben Zacharry Quandt, kende ta esun cu a tira Sky. Den e articulo aki DIARIO ta publica e caso di Nortan.

   TIRAMENTO DEN RANCHO:

Presidente di Hof a puntra Nortan pa splica kico a sosode riba 18 Augustus 2018 anochi. Nortan a bisa cu el a worde yama pa bay topa cu e grupo. El a bay cu auto pa topa nan y nan a dicidi di bay dal bocht na diferente lugar. Nan a pasa den Rancho caminda e muhernan di bida ta para y despues e tiramento a sosode.

Ora el a pasa un biaha den Rancho, el a worde pidi pa pasa un biaha mas. E no tabata sa pakico. Ora el a scucha tiro el a realisa cu a tira for di e auto riba hende. Presidente di Hof a bisa cu for di declaracionnan di esnan den auto, tin algun a bisa cu Nortan tabata sa cu nan ta bay tira.

A menciona J.W. kende a bisa cu dos biaha Quandt a puntra si mester tira y a worde bisa si. Despues cu Quandt a los tiro, Nortan a hari y a core duro bay. Nortan a reacciona y bisa Hof cu no ta asina. El a bisa cu el a bay den panico y a core bay.

Presidente di Hof a mustra cu Quandt a declara cu el a puntra dos biaha, tira? Dos biaha a worde bisa si. Despues cu a tira, Nortan a hari y core bay duro.

Quandt a declara cu Nortan tabata e promer persona cu a bisa “si” pa tira. E no a haci caso pasobra e tabata kier haya ok di esun cu a dune e arma.

Segun Nortan no ta asina. Presidente di Hof a bisa cu tin dos testigo cu ta declara casi mesun cos contra Nortan. Hof a mustra cu Hues di Corte den Promer Instancia a usa e declaracionnan aki como prueba contra Nortan y cu ta mustra cu Nortan tabata sa di e tiramento.

Nortan a bisa Hof cu e no tabata sa e momento ey cu ta for di e auto a tira. El a kere cu ta for di otro caminda a tira. Hof a remarca cu for Nortan su declaracion ta mustra cu Quandt a los tres tiro y e ora ey el a core bay.

   PG A PIDI PA MANTENE E CASTIGO:

Procurador Genral (PG) ta haya legalmente proba cu Nortan a core e auto y Quandt a tira. PG a bisa cu ley ta mustra cu si bo a ocasiona algo, bo ta responsabel pa e consecuencia. Den e caso aki Sky a worde tira den Rancho y esey a causa infeccion na su tripanan cu consecuencia cu el a fayece. El a worde hiba hospital y a haya tratamento pero despues el a bay for di hospital. Kico tabata e motibo no ta conoci. E dokter cu a atende Sky a fayece.

Hende cu a haci algo malo, e ta responsabel pa e consecuencia. PG ta haya cu apesar cu si ta Sky a deshaci di tratamento y bay for di hospital, Quandt y Nortan ta responsabel. E ta haya cu tin un relacion directo entre e tiramento y e morto di Sky. PG ta haya cu Nortan ta complice di e tiramento. El a pidi Hof pa mantene e castigo cu Hues di Corte den Promer Instancia a duna.

   DEFENSA:

Abogado mr. Illes a bisa Hof cu Nortan enberdad tabata presente pero no ta haya cu e ta complice. Na opinion di mr. Illes, Hues a bisa cu Nortan tabata stuur e auto y ora a pasa den Ranchostraat y a mira hendenan di un gang para, a pidi Nortan pa pasa atrobe y e ora ey a tira. E abogado ta haya cu inhustamente Hues ta conclui cu Nortan tabata sa cu miembronan di un gang di Rancho tabata para y cu el a bisa si ora Quandt a puntra si mester tira.

E abogado a bisa Hof cu Nortan ta para riba cu cos no a sosode asina. El a mustra cu Nortan no conoce miembronan di gang di Rancho. Nortan no a scucha Quandt puntra si mester tira. Na opinion di mr. Illes, ademas di e dos testigonan cu ta bisa cu Nortan a bisa si, tin otro testigonan cu ta bisa cu Nortan no a bisa nada y cu ta Quandt a bisa cu e ta tira aunke cu ningun hende a bise algo riba su pregunta si mester tira.

E abogado a bisa Hof cu e ta haya cu ta dos agente cu a scucha e otronan cu tabata den e auto, a bay scucha J.W. como 10 dia despues caminda e ora ey J.W. a bisa cu Nortan a bisa ‘si’.

E abogado a mustra cu aki ta tres testigo contra dos. E dos testigonan cu a bisa Nortan no a bisa nada y Nortan mes, contra Quandt y J.W. E abogado a remarca cu J.W. a duna declaracionnan cu no ta cuadra cu e berdad. Na opinion di e abogado, tur cos a sosode net riba e cruzada un poco promer cu Ranchostraat. Eynan a pasa Quandt e arma y el a tira.

E abogado ta haya cu tur esaki ta mustra bon cla cu Nortan no tin nada di haci cu e tiramento y mester worde declara liber mescos cu J.W.

Hof a sera tratamento di e caso y a bisa cu dia 10 Februari 2020 lo tin sentencia.

- Advertisement -

DUNA COMENTARIO

Please enter your comment!
Please enter your name here