Home Turismo AHATA mustrando cu prijs di camber na Aruba ta depende hopi tambe...

AHATA mustrando cu prijs di camber na Aruba ta depende hopi tambe riba oferta y demanda

38
0
SHARE
- Advertisement -

ORANJESTAD (AAN): CEO y Presidente di Aruba Hotel & Tourism Association Tisa LaSorte a mustra cu turismo pa Aruba den 2018 y 2019 tabata bon.  Sinembargo tin cierto desaroyo pasando den Caribe, cu Aruba tin di tene cuenta cune.  Hecho ta cu e otro islanan tambe ta focus hopi fuerte mes pa mehora nan mercado turistico, y Aruba tin di keda vigila nan.

Segun LaSorte, tin di corda semper cu turismo ta algo fragil.  Cualkier cos chikito cu socede por afecta turismo grandemente y cambia futuro di e isla.

El a admiti cu e ‘demanda extra’ cu Aruba a haya algun tempo pasa, a bin debi na e hecho cu e resto di Caribe tabatin menos inventario den e temporada ey.  Aki bo tin di corda cu varios isla den Caribe a wordo afecta pa Horcan y demas desastre natural.

Awor tin inventario ta yegando acerca den e region, esey ta inclui inventario nobo!  Na Aruba te cu awor e producto turistico ta bon, cu bon calidad, servicio, y reputacion.  Pero bo ta cuminza competi cu hopi otro isla cu tin hotelnan nobo, cu cambernan mas grandi, y otro aspecto cu Aruba no tin.  Debi na esaki bo tin di realiza cu bo tin di traha pa gana e turista ey bek.  Y esey ta preocupacion di AHATA.

LaSorte a mustra cu nan ta mirando cifranan, unda cu ta mira cu e crecimento tey ainda.  Pero e crecimento ta cuminza baha, y esey ta un ‘patronchi’.  Bo ta mira cu e demanda ta cuminza baha.

Aruba tin di corda cu 80% di turistanan ta bin di Merca, pero tin di corda cu tin rumor cu e mercado Mericano ta bayendo pa un recesion, y tambe e ta un aña di eleccion cu tradicionalmente nifica un aña unda hendenan ta gasta menos placa.

AHATA no kier sona manera cos ta bay malo, pero djis recorda hende cu futuro por ta diferente.  Y pesey bo tin di traha pa diversifica bo mercado, y cu bo no ta depende kizas mas di e 80% di Merca.  Tambe traha pa gana e turista ey tur dia, y no kere cu djis pa naturaleza nan lo sigui bishita e isla.

Pues tin di traha mas duro atrobe pa asina sigui gana curazon di e turistanan pa nan sigui bishita e isla.  Aki tambe tin di enfoca riba mercadeo, sigui duna bon servicio, ofrece seguridad na turistanan tambe.

Ora cu tin mas camber na caminda, e lo nifica cu e isla tin mas inventario y e ora ey e balor ta cuminza baha un tiki tambe.  Bo tin di amplia e demanda y tambe pensa cu no tin hopi empleado pa e sector aki.  Ya tin varios Hotel cu ta reclamando cu nan tin dificultad pa haya trahador pa e cuponan disponible.  Si bo mester ‘amplia’ e empleadonan pa mas camber, e ora bo nivel di servicio por bira menos pa cada uno.

Prijs pa camber di hotel pa e turistanan ta basa riba diferente aspecto.  Ora cu por ehemplo gastonan di business subi, prijsnan di cambernan tambe ta subi.  Pero corda cu prijs di camber ta basa tambe riba gasto di operacion, belasting (tax), y tambe segun oferta y demanda.

E hecho cu Aruba tabatin un RevPar mas halto ultimo añanan ta bin debi cu Aruba por a cobra ‘un tiki mas’, debi cu tabatin demanda mas halto pa camber pa motibo di loke a pasa den Caribe.

Pero ora cu e demanda baha, bo mester bay baha prijs.  Si acaso e costonan ta halto, no tin e margen pa baha prijs di camber.  Esey ta ponebo core peligro, y loke bo por haci ta percura pa bo tin menos hende emplea (esey ta unico costo cu bo por baha), y esey na su turno lo baha bo nivel di servicio.  Esey ta e peligro ora cu e ‘vaste kosten’ ta mucho halto.

Toch e CEO di AHATA a splica cu tin biaha, aunke e balor di prijs di camber a keda bon, bo ta mira toch con huespednan ta gasta menos den Food & Beverage.  Pues tin biaha tin otro tipo di indicacion cu bo mester analiza y compronde tambe, pa asina check si e ta patronchi cu ta sigui.

 

- Advertisement -

DUNA COMENTARIO

Please enter your comment!
Please enter your name here