Home Hudicial Aruba no tin suficiente clinica pa atende adictonan problematico

Aruba no tin suficiente clinica pa atende adictonan problematico

154
0
SHARE
- Advertisement -

Ministerio Publico y Corte di Husticia ta cu mannan cruza pa actua

ORANJESTAD (AAN) – Pa añanan Gobierno di Aruba no ta atende cu e problema creciente di adictonan problematico. Gobierno tabata hunga e politica di avestruz, caminda tabata manda algun persona Curacao pa haya tratamento den clinica.

Sinembargo door cu Gobierno no tabata cumpli cu pagonan, e personanan a wordo manda bek y awor Ministerio Publico y Corte di Husticia ta cu mannan cruza pa actua contra e adictonan problematico cu tin problema mental y no tin caminda pa nan haya tratamento.

SCARCEDAD DI PERSONAL

Recien tabatin un caso den Corte di Husticia caminda un homber a presenta dilanti Hues pa un serie di ladronicia y destruccion cu el a haci. E homber, kende tabata biba den un school abondona, ta adicto y ta sufri di problema mental. El a admiti tur e delitonan y a bisa cu e tabata scucha un stem ta papia cun’e. Door cu el a wordo deteni, a hib’e Paaz caminda el a haya pildernan cu segun e acusado ta yud’e pasobra e no ta scucha e stemnan.

Pa colmo de los colmos, Centro di Motivacion a manda un carta pa Ministerio Publico cual a bay pa Hues. E carta ta informa cu debi na scarcedad di personal, no por tuma mas hende. E informacion aki a cay manera un bom den sala di Corte caminda Fiscal a remarca cu aki a dal contra muraya pa purba yuda e acusado.

Abogado mr. Carlo a remarca cu ta tur ora ta asina. El a bisa cu falta di motivacion politico pa drecha e situacion.

Hues tabata haci e acusado un cantidad di pregunta pa mira con lo por haci pa acomoda e acusado un caminda. Ta asina cu tin raport di psychiater cu ta mustra cu e acusado mester di tratamento pero den un clinica. E acusado a bisa Hues cu e kier sigui bay Paaz. Hues a mustra cu Paaz ta yen y no por tuma mas hende.

E preocupacion cu tabata reina serca Hues, Fiscal y abogado ta cu si laga e acusado sali for di KIA, e chens ta hopi grandi cu e ta bolbe cay den adiccion. E acusado a bisa Hues cu e por bay keda serca su ruman homber tanten. El a bisa cu e tin contacto cu su ruman homber y nan ta bon cu otro.

Tabatin basta discusion den sala di Corte y finalmente Hues a confirma e exigencia di Fiscal cu tabata un castigo combina caminda a palabra cu e acusado cu e lo bay serca su ruman y cu su ruman lo bay buske na KIA.

NO TIN CLINICA

Pa basta tempo Aruba ta confrontando e problema serio aki y ta parce cu ainda no tin solucion. Algun aña pasa, tempo cu mr. Lemaire tabata e cabez di Corte di Husticia di Aruba, DIARIO a tene un entrevista cun’e caminda el a bisa cu tin plannan pa traha un centro. Lo tin estudionan cu mester sosode pa mira si ta mas mihor cu cada pais tin su centro of si ta trata un centro na un di e islanan cu e fin pa atende tur esnan adicto problematico cu problema mental.

Añanan a pasa y no a tende nada mas di e plan aki. A bira tempo pa Gobierno profundisa riba e asunto aki y mira con leu ta cu e plannan aki.

DRECHA SCARCEDAD

Awor ta di urgencia pa Gobierno yena e scarcedad cu ta reina na Centro di Motivacion pa asina a lo menos tin un lugar pa por atende hendenan. Si no haci esaki, tanto Ministerio Publico como Hues di Corte di Husticia ta cu mannan cruza pasobra no por ordena tratamento obligatorio si no tin un clinica pa haci esaki. No ta na su lugar tampoco pa duna castigo di prison largo, djis pa tene cuida pueblo di e personanan aki.

- Advertisement -

DUNA COMENTARIO

Please enter your comment!
Please enter your name here