Home Gobierno Aruba ta e Destinacion y Puerto number 1 pa Carnival Cruise Lines,...

Aruba ta e Destinacion y Puerto number 1 pa Carnival Cruise Lines, mundialmente

218
0
SHARE
- Advertisement -

Minister Dangui Oduber

Basa riba ranking di tur Destinacion y Puerto cu nan ta bishita

ORANJESTAD (AAN): Diabierna ultimo un delegacion di Aruba consistiendo di Minister di Turismo, Salubridad y Deporte, Sr. Dangui Oduber hunto cu CEO y Director di Aruba Tourism Authority (A.T.A.) y Aruba Ports Authority (APA), Sra. Ronella Tjin Asjoe-Croes y Sr. Marc Figaroa, como tambe Consehero di Minister di Turismo, Srta. Sharlyze Romano, CFO di APA, Sr. Humphrey Tromp y Cruise Manager di A.T.A., Sr. Mario Arends, a sostene diferente reunion dirigi riba turismo crucero. Entre otro a reuni cu Carnival Cruise Lines na Miami, unda a toca diferente topico di importancia pa e industria di crucero di Aruba.

Durante e reunion aki, Carnival Cruise Lines a duna Aruba e grato noticia cu Aruba a conquista e promer puesto como e mihor destinacion y puerto riba nivel mundial. Esaki a surgi a base di puntuacionnan cu pasaheronan di e linea di crucero ta duna na diferente aspecto di nan vacacion y itenerario di e biahe crucero manera calidad di servicio, amabilidad, compras, restorantnan, infrastructura, etc.

Aruba ta consistentemente un destinacion fuerte, cu semper ta score bon, y cu a tuma e puesto di promer lugar na 2019. Aruba su averahe den e ultimo aña ta riba 9 punto (10 ta e maximo), cual  ta un puntonan sumamente positivo y cu a duna Aruba e empuhe necesario pa logra obtene e posicion di mas halto den e region di Caribe y di mundo. Ehecutivonan di e linea di crucero a expresa hopi elogio pa Aruba. Aruba ta un destinacion y puerto ehemplar pa Carnival Cruise Lines. E linea di crucero a acentua e importancia di con Aruba ta desplega trabou di equipo cu un colaboracion estrecho entre Aruba Tourism Authority y Aruba Ports Authority implementando e maneho estableci pa Minister di Turismo y Gobierno di Aruba.

Carnival Cruise Lines ta e linea di crucero di mas grandi na mundo y a trece casi 200 mil turista crucero na 2019.

Minister Dangui Oduber a expresa su satisfaccion grandi y a enfatisa e importancia di e partnership entre Aruba y Carnival Cruise Lines y a compromete pa sigui traha den e mesun forma pa mantene y amplia e ventaha competitivo cu actualmente Aruba ta gosa di dje.

Minister Dangui Oduber ta felicita A.T.A., APA y tur esnan cu ta traha den e industria aki ya cu logronan manera esaki ta bin a base di trabou hopi duro pa asina por brinda e mihor experiencia posibel na nos bishitantenan. E Minister ta indica cu esaki ta sirbi como estimulo pa sigui bay dilanti y mester sirbi como un momento pa wanta nos skerpi, a yega number 1 mester sigui haci esfuerzo pa mantene esaki.

- Advertisement -

DUNA COMENTARIO

Please enter your comment!
Please enter your name here