Home Policial Atraco violento riba cas di famia Asiatico na Sero Blanco

Atraco violento riba cas di famia Asiatico na Sero Blanco

658
0
SHARE
- Advertisement -

ORANJESTAD (AAN): Solo apenas a caba di sali algun momento prome, ora cu yamada a drenta na Central di Polis indicando cu un caso di atraco a wordo registra.

Tabata Dialuna banda di 7:45 am, cu Polis a haya e yamada cu un atraco a caba di socede na un cas na Sero Blanco.

Cu luz y sirena, un unidad di Polis a mobiliza y a yega basta rapido na e adres Sero Blanco 47-D, cu ta keda como 200 meter mas panort di entrada principal di Setar su edificio principal.

Na yegada di polis, e agentenan a compronde cu un rato prome dos atracador a yega na e cas, y bao di menaza di arma di candela, nan a duna ordo y e.o. a mara tres persona den e cas.  E atraco a bira violento, ora cu e atracadornan a maltrata dos habitante di nan cu arma di candela.

E atracadonan a papia spaño, y nan tabatin nan cara tapa. Tur dos tin arma di candela.

Despues e atracador a huy den un auto cu tabata staciona pafo, y cu un chauffeur sinta cu motor cendi ta wardando riba nan.  Polis a bisa prensa cu e color di e auto aki no ta conoci.  E atracadornan a baha na awa cu como 5.000 Florin cu e famia Asiatico tabatin na e cas.

Unidadnan di Polis mesora ariba caya a cuminza tira bista, mientras cu Ambulans a wordo yama.  Esey ta debi cu un di e personanan a keda basta herida, y a wordo transporta pa Servicio di Emergencia na Hospital.

Atraco Team a presenta na e lugar y a cuminsa cu nan investigacion. Halto Comisario Sr. Hoo tambe a yega pa check.  Polis tecnico di Departamento di BFTO tambe a presenta y Slachtofferhulp a yega pa sostene e famia, cu a keda hopi spanta mes di e episodio aki.

Awor ta bay traha riba e puzzle aki, pasobra e atracadornan simplemente tabata enbusca di placa, y nan sa cu e famia aki tin negoshi.  Awor Recherche ta bay check den e bario pa mira kende lo por tin Security Video Camera cu por a capta e movimento.

Toch di awor caba, Cuerpo Policial ta haci un suplica na esun cu Dialuna mainta trempan a mira algo of sa algo, pa yama e Tipline di Polis cu ta 111-41.

 

 

- Advertisement -

DUNA COMENTARIO

Please enter your comment!
Please enter your name here