Home Hudicial Caso di traficacion di ilegal caminda dos a hoga den Corte Superior

Caso di traficacion di ilegal caminda dos a hoga den Corte Superior

198
0
SHARE
- Advertisement -

Ministerio Publico a apela cu Hues a baha e castigo exigi

ORANJESTAD (AAN) – E tres homber Venezolano A.C., J.C. y A.L., otro siman lo mester presenta den Corte pa e apelacion di Ministerio Publico contra e sentencia di Hues di Corte den Promer Instancia.

Ta asina cu e trio aki, a wordo haya culpable cu nan a trece un cantidad di ilegal Aruba riba 20 October 2018 y cu dos di nan a hoga. Ta asina cu Fiscal a exigi 10 aña di prison pa tur tres y Hues a baha e castigo na 4 aña di prison pa A.L. y J.C. Hues a baha e castigo mas ainda pa A.C. El a condena A.C. na 4 aña di prison di cual 1 aña ta condicional.

FISCAL A EXIGI 10 AÑA DI PRISON

Tratamento di e caso tabata aña pasa caminda Fiscal a bisa cu e ta haya legalmente proba cu e trio aki tabata encarga cu e traficacion di ilegal pa Aruba riba 20 October 2018. Fiscal a cuestiona e hecho cu nan tabata den un boto, sin luz, sin sistema di navegacion y sin salba bida. Fiscal ta haya cu e trio a pone bida di tur abordo na peliger. Lamentable tabata e hecho cu dos homber a hoga na momento cu mester a bula for di boto y landa pa yega tera. Fiscal a bisa cu si tabatin salba bida, ningun hende lo a hoga. Fiscal ta haya cu tur tres ta mesun culpable y a exigi 10 aña di prison pa cada un.

HUES A BAHA E CASTIGO

Dia 2 di Juli 2019, Hues su decision riba e caso aki ta, cu e ta haya tur tres Venezolano A.C., J.C. y A.L., culpable di a trafica ilegal pa Aruba. Hues a cuestiona e hecho cu a usa un boto chikito pa cruza laman bruto sin cu tabatin luz, salba biba y sistema di navegacion. E boto a pega y tur abordo mester a bula den laman pa landa yega tera. Esaki a causa cu dos di e ilegalnan a hoga.

Hues a mustra cu door di traficacion di ilegal por trece situacion hopi fastioso pa comunidad di Aruba. E ta haya cu e trio Venezolano a abusa di e situacion na Venezuela.

Hues a bisa cu evaluando henter e situacion, e ta haya cu e castigo di 10 aña di prison exigi pa Fiscal, no ta na su lugar. Pa cu e castigo, Hues a bisa cu e ta tene cuenta cu e trio no tabatin intension cu hende lo muri.

Hues a condena A.L. y J.C. na 4 aña di prison, kitando e tempo cu nan ta sera den KIA. Hues a bisa cu e ta haya e funcion di A.C. menos compara cu A.L. y J.C. Hues ta haya cu A.C. no tabata e organizador sino a yuda. El a condena A.C. na 4 aña di prison di cual 1 aña ta condicional cu un tempo di prueba di 3 aña. Esey ta nifica cu A.L. y J.C. a wordo condena na 4 aña di prison y A.C. na 3 aña di prison.

FISCAL A APELA

Investigacion cu DIARIO a haci ta mustra cu Fiscal a apela e sentencia y ya e procedura ta asina leu cu otro siman tratamento di e caso ta tuma lugar. Tres Hues di Corte Superior, cu ta forma Hof, lo trata e caso completo. DIARIO lo informa lectornan tur loke sosode den sala di Corte di Husticia di Aruba.

 

- Advertisement -

DUNA COMENTARIO

Please enter your comment!
Please enter your name here