Home Hudicial Dos funcionario Inmigracion Aeropuerto a falsifica documento pa stranheronan por drenta Aruba

Dos funcionario Inmigracion Aeropuerto a falsifica documento pa stranheronan por drenta Aruba

5237
0
SHARE
- Advertisement -

Fiscal a exigi 24 y 21 luna di prison pa nan

ORANJESTAD (AAN): Diahuebs mainta Corte den Promer Instancia a trata e caso penal cu Ministerio Publico a cuminsa contra dos empleado di Inmigracion, kendenan ta worde sospecha di tabata falsifica documento pa extranheronan por drenta Aruba. Fiscal a exigi 24 luna di prison pa e homber J.H. y 21 luna di prison pa e muher S.G.

Tratamento di e caso tabata hopi largo. DIARIO lo bay traha diferente articulo di e caso aki pa asina lectornan tin un mihor bista di e caso. Den e articulo aki ta publica e parti di e acusacionnan y e exigencia di Fiscal.

  ACUSACIONNAN:

E acusacionnan cu Fiscal a presenta Diahuebs mainta den sala di Corte di Hustica ta cu J.H. y S.G. ta worde sospecha di entre Januari 2018 y 8 Mei 2019, a trafica hendenan extranhero. Tambe nan ta worde acusa di falsificacion di document y haya placa pa haci e trabounan aki cual ta contra nan trabao.

Tambe nan ta worde acusa di ta forma parti organizacion di un organizacion criminal. Ta asina cu tin tres persona mas envolvi den e caso aki pero e caso contra dos a worde declara no admisibel y lo worde trata despues y e caso contra un a keda pospone. E casonan aki lo worde trata den curso di e lunanan cu ta bin.

LAGA HENDE DRENTA VIA INMIGRACION:

Hues a bisa cu e caso aki ta hopi grandi caminda ta un cantidad di hende a drenta Aruba door di laga nan pasa na Inmigracion sin haci e controlnan debido a cambio di pago. Den e caso di J.H., el a hasta cambio di informacionnan di cierto personanan riba computer pa laga pasa cu nan a sali for di Aruba y bolbe drenta, siendo cu en realidad no ta asina. Di e forma aki e personanan por a keda mas tempo riba e isla.

Ayera mainta tanto J.H. como S.G. a dicidi di papia e berdad den Corte. Ta asina cu anterior J.H. a haci uso di derecho di silencio y no a duna declaracion na Polis, mientras cu S.G. si a duna declaracion.

Hues a cuminsa cu traficacion di hende. Investigacion ta mustra cu tanto J.H. como S.G. a laga hendenan ilegal drenta via Inmigracion siendo cu nan mester a worde nenga pa drenta Aruba. Nan a cambia informacion riba computer di nan lugar di keda y periodo di keda riba Aruba. A haya placa pa haci esaki. Hues a bisa cu investigacion ta mustra cu tabatin un relacion organizatorio entre J.H. y S.G.

Durante tratamento di e caso, J.H. a admiti di laga hende drenta Aruba. Promer e ta bisa di no a haya placa pasobra ta hendenan cu e conoce, pero despues e ta bisa di a haci placa. Ta ser papia di 600 Dollar pa cada biaha cu J.H. tabata falsifica e permiso di estadia pa ilegalnan.

Hues a mustra cu J.H. a trece su partner, kende tabatin prohibicion pa drenta Aruba, back. Esaki door di cambia informacion den computer y usa un otro pasaporte di e dama. J.H. hasta tabata traha cartanan di dispensacion, pa hendenan ilegal por keda riba Aruba.

E sospechoso S.G. a bisa cu e no tabatin acceso riba computer pa cambia informacion. El a bisa cu ariba peticion di J.H., el a yuda pa tres muher drenta Aruba. El a sigui bisa cu e tabata yuda hendenan ilegal via e sospechoso e homber S.M.C. E sospechoso S.M.C. ta un extranhero cu tabata cobra ilegalnan na Aruba pa prolonga nan estadia y S.G. tabata haci esaki y tabata haya placa pa esaki. El a bisa Hues cu e hendenan a drenta via Inmigracion normal pero despues el a prolonga nan estadia. El a admiti tambe di a haya pago pa esakinan.

   EXIGENCIA DI FISCAL:

Fiscal ta haya legalmente proba e acusacionnan contra e duo. Fiscal a cuestiona e hecho con e dos empleadonan di Inmigracion aki, tabata abusa di nan trabao. Nan a viola e reglanan estableci pa asina tin un control debido riba tur hende cu ta drenta Aruba. Esaki pa nan haya placa. Esaki ta duna un mal imagen di Inmigracion na aeropuerto. Fiscal ta haya cu mester manda un señal bon cla cu esaki no ta acceptable. El a exigi 24 luna di prison pa J.H. y 21 luna di prison pa S.G. Hues, despues di a scucha defensa di mr. Illes a sera tratamento di e caso y otro luna 13 Februari 2020 lo por spera sentencia.

- Advertisement -

DUNA COMENTARIO

Please enter your comment!
Please enter your name here