E alegria y dolor di nacemento di un pais 

    1313
    0
    SHARE
    - Advertisement -

    Un vision a bira mision pa libertad y dignidad nacional

    Dia 25 di Januari 1938 pa prome bes, Señora Mimita Croes a carga Gilberto Francois Croes den su brasa.  E no tabata na haltura kico bida tabata tin prepara pa e baby, cu lo a cambia historia di Aruba.

    Awe, den un mundo totalmente diferente, un Aruba autonomo den Reino ta recorda Betico Croes, cu a lucha pa su vision bira mision di tur Arubiano cu a uni pa alcansa libertad y dignidad di nan Aruba.

    Betico Croes a presenta un plan pa realisa un futuro nobo pa Aruba. Betico tabata lider, den e sentido cu e tabata alma y motor di anhelo di tur Arubiano cu mester a duna nan parti, nan talento, nan forsa y capacidad, pa un Aruba liber y autonomo den Reino bira realidad.

    Jossy Mehsen Mansur tabata un Arubiano, cu a haya oportunidad pa desaroya su interes, talento y conocemento riba uno di e aspectonan mas grandi cu cultura di un pais ta produci, cu ta e idioma.

    E lenga materno di un pais ta carga e alma di e pueblo cu mester comunica a base di palabranan cu e cultura, historia y moral di un pais a haci vehiculo mas importante pa union di un pais.

    DIARIO, cu a bira vocero di e lucha pa libertad, a entrega na futuro generacionnan e historia diario di e pais Aruba y e relatonan den cual e alegria y e dolor di e lucha pa libertad di Aruba ta hancra.

    E lucha a culmina na 1983 ora cu triunfo Betico Croes a entrega na DIARIO e informacion cu Status Aparte ta bira realidad dia Prome di Januari 1986.

    E edicion di DIARIO pa anuncia Aruba cu e pais a logra den su lucha, a wordo prepara cu alegria dificil pa describi.

    Aruba a saluda e delegacion cu e bolbe cu triunfo for di Hulanda pa cuminsa traha sin perde tempo riba realisacion di e Status Aparte.

    Dia 24 di april 1983, alegria tabata compaña e Barco di Libertad, e vehiculo central den e parada di MEP den campaña electoral. E ruta a wordo cambia y e fila largo a wordo dirigi pa e Veld di Winston pa evita cu e lo topa cu parada di e partido opositor di MEP.

    Alegria a bira dolor ora un bala a herida e lider di Aruba cu mester a wordo transporta pa Merca, caminda Jossy Mansur tabata spera su amigo Betico, cu a recupera.

    E pagina mas tristo a bini despues. Salida di Lago a wordo uza dor di contrincantenan pa kibra e forsa politico di Betico Croes na entrada di e Status Aparte di Aruba, cu tabata su logro historico.

    Un coalicion a wordo forma prome cu eleccion dor di adversarionan di Betico Croes cu despues di eleccion por a forma e prome gobierno di Aruba, den cual Betico Croes no tabata participa.

    DIARIO  tabata prepara Aruba pa su Status Aparte y e base legal nobo cu Betico a laga atras, por a forma un futuro.

    Dolor tabata e marca di Aruba e anochi di 31 di December 1985. Un grupo grandi no tabata presente na e actividadnan pa saluda Status Aparte. Nan tabata na hospital caminda Betico Croes tabata lucha pa su bida despues di un accidente den trafico.

    Betico Croes, e heroe nacional cu a entrega Aruba su libertad, a muri leu di su pais. E lo keda bibo semper pa DIARIO,  cu Jossy Mehsen Mansur a introduci como vehiculo pa realisa e lucha di Status Aparte, e lucha di libertador Betico Croes.

    - Advertisement -

    DUNA COMENTARIO

    Please enter your comment!
    Please enter your name here