Home General E caranan scondi di supervision di democracia

E caranan scondi di supervision di democracia

109
0
SHARE
- Advertisement -

Nombra pa politiconan nan tin influencia grandi

*Pregunta si ta experto so ta nombra pa supervisa 

E sistema democratico manera Aruba conoce, ta basa directamente riba e decision di pueblo riba su gobierno.

Problemanan cu e crisis actual a nifica pa Aruba ta duna prueba cu no semper politiconan ta comprende nan tarea sagrado pa cual pueblo a scoge nan. E hecho cu awe Aruba ta victima di abuso di confiansa di pueblo y abuso di placa di pueblo cu a wordo malgasta, no ta base pa pueblo ta na haltura di nomber di tur persona cu ta supervisa interesnan di Aruba.

Instancianan independiente, empresanan estatal, fundacionnan di gobierno entre otro, ta wordo dirigi pero tambe supervisa pa personanan cu politiconan ta nombra. Si pueblo ta na haltura kende ta miembro di Parlamento y kende ta gobernante of parti di nos sistema hudicial, den mayoria di caso pueblo no ta conoci cu e caranan di supervision di institutonan cu mester garantisa democracia.

Tin diferente nomber pa e instancianan cu ta riba gerencia diario di instancianan cu pa nan caracter independiente segun ley, ta encarga cu supervision di entidadnan hopi importante cu ta mishi cu nos sistema democratico.

Nos ta referi aki na Consehonan di Comisario, Conseho di Supervision, Conseho y mas Conseho di instancianan cu no tin cara pa pueblo, cu no ta na haltura kende politiconan a pone den e puestonan aki.

Tin un peliger hopi serio den e asunto aki cu mester wordo discuti den Parlamento pasobra e caranan cu politiconan ta nombra pa supervisa instancianan importante den nos sistema, ta desconoci pa pueblo cu ta gobernacion directo di nos pais.

A base di kico a nombra kende den cual conseho di supervision of hunta di comisario?

DIARIO como matutino tin derecho di haci e pregunta aki pasobra personanan cu haya un tarea similar mester ta experto riba nan tereno y mester por convence pueblo cu nan no ta bay permiti ningun politico bay contra interes di Aruba.

Nos no ta punta riba ningun conseho ni organo directamente pero si nos mester señala un peligro scondi pa nos sistema democratico, cu por haci cu indirectamente politica ta wordo hunga loke ta completamente contra democracia.

Nos sistema politico ta basha abou si dirigentenan cu un partido politico a pone y ta keda na nan posicion aunke e partido a bay cas, ta dirigi un empresa cu ta wordo supervisa dor di personanan cu mes politiconan a nombra y cu no ta experto riba nan tereno.

Nos tin motibo pa expone e realidad aki cu ta paralisa un gobernante cu pueblo a scoge pa dirigi den su trabou pasobra ningun hende por mishi cu e personanan desconoci pa pueblo pero ta bira un tipo di dios pasobra nan ta encarga cu supervision di instancianan oficial.

Pa kita tur duda cu no por ta existi den nos sistema democratico, ta na su luga pa instancianan oficial independiente, companianan di pueblo y fundacionnan di pueblo entre otro haya un cara completo pa pueblo.

E votado mester haya tur informacion di e persona cu ta supervisa na su nomber y ta bira intocabel.

Nos ta keda pendiente riba e punto aki ya cu mester evita cu loke ta parce di ta bon regla, ta un bofon di democracia.

- Advertisement -

DUNA COMENTARIO

Please enter your comment!
Please enter your name here