Economia di Aruba den gara di tension mundial

    1761
    0
    SHARE
    - Advertisement -

    Prioridad ta pa prepara Aruba pa scenario mundial dificil 

    • Aruba sin reserva ta enfrenta culminacion peliger hereda

    • Crisis local ta topa cu crisis internacional na pio momento 

    ORANJESTAD(AAN)– E prome mita di Januari 2020 a cera Diamars cu un tension enorme na Venezuela, Cuba, Europa, Merca y Iran. DIARIO tabata den contacto estrecho na un forma continuo cu informantenan a base di un situacion mundial sumamente delicado cu resultado directo pa Aruba.

    “Economia di Aruba ta den gara di un tension mundial. Parlamento di Aruba na e momentonan aki mester bini hunto cu Gobierno pa papia di e scenario mundial dificil mientras pueblo di Aruba mester wordo informa di loke siguridad di e pais ta exigi. ”

    Esaki tabata e mensahe sumamente cla cu DIARIO a ricibi na e momento cu e crisis local a base di problemanan serio di e pais ta topa cu un crisis internacional pa cual mundo mes no tabata prepara pero a bini ta anuncia su mes pa hopi dia.

    “Loke a pasa na Iran no mester sorprende ningun hende cu a sigui noticia internacional.  E problemanan grandi entre mundo Occidental y Iran no ta di awe pero tin mas cu un decada ta wordo atendi cu acuerdonan solido,” a wordo mustra.

    Diamars a cera cu Europa cu un indicacion na Iran cu e no tabata tene su mes na e acuerdo cu tabata tin pa duna tempo pa yega na un solucion.

    Oposicion di Iran a sigui protesta mientras un persona a wordo deteni como e persona cu a presenta e prueba cu forsa Irani a tumba e avion di pasahero cu inocentenan a bordo.

    Na Venezuela, regimen Nicolas Maduro a dicidi cu Asamblea Nacional Constituyente ta reuni tur dia na e Palacio Legislativo, caminda Asamblea Nacional bou Juan Guaidó, tin planea pa reuni sigur Diaranson. Por spera un confrontacion mas na Venezuela, cu segun Nicolas Maduro mester bay cumpli cu acuerdonan nobo (Rusia y China).

    Cuba a anuncia cu e tin problema di gas, mientras avionnan charter for di Merca  pa ciudadnan cu no ta capital di Cuba , a wordo prohibi.

    Merca mes ta den gara di e problemanan serio den su Congreso, caminda e presidente Democrata di Cas di Representantenan a priminti ayera nochi cu e lo manda documentonan pa impeach Trump awe pa Senado.

    Tension mundial ta aumenta pa Aruba cu mester habri caminda nobo pa restauracion economico necesario pa por confronta e problema financiero serio cu a wordo hereda na 2017 di gobierno anterior.

    “Incertidumbre ta marca Aruba riba tur tereno den e situacion internacional actual. Aruba mester amplia su economia pa reemplasa e promesa falso di Citgo, mester tuma medida pa haya mas entrada mientras su turismo mester di vigilancia total den e problemanan mundial actual,” informantenan a bisa.

    Gobierno anterior a laga Aruba sin reserva y na e momentonan aki Aruba mester wordo reconstrui sin e sumanan cu a bay pa proyectonan cu no tabata tin necesidad di tanto placa pero cu a bira peso grandi pa Aruba na mal momento.

    Segun informantenan e momento a yega pa palabra cla wordo papia cu Aruba cu ta enfrenta un situacion mundial, cu por tin desaroyo serio pa su economia y un futuro cu ya a wordo manca pa e crisis financiero local.

    - Advertisement -

    DUNA COMENTARIO

    Please enter your comment!
    Please enter your name here