Home Parlamento Endy Croes mustrando cu ta facil pa splica e 30 miyon di...

Endy Croes mustrando cu ta facil pa splica e 30 miyon di gasto na CAft

190
0
SHARE
- Advertisement -

ORANJESTAD (AAN): Parlamentario Endy Croes ta di opinion cu e mundo aki di berdad ta riba su cabez. CAft a saca su conseho riba e presupuesto 2020.

Nos por a tuma nota con Richard Arends di AVP ta esun cu a gara e conseho aki cu dos man teni na rabo di e fli. Richard Arends ta esun cu kier splica con pa drecha finanzas publico? Richard Arends, bo ta echt serio?

Abo cu a strica 4 miyon cu bo compania Horizon Consultancy pa conseha Mike Eman riba finanzas? Richard Arends kende ta padrino di e KB na 2014 cual Hulanda a claba Mike cune? Richard Arends, esun cu a firma cu Mike de Meza un contract di Directeur Financiero na RDA di 2 miyon Florin? Si nos no a gara e documento aki ainda Richard lo tin su contract lucrativo bon scondi y ora gobierno cambia e ta cana drenta RDA y sigui cobra. Ki barbaridad!

Momento di berdad a yega:

CAft di otro banda tambe ta hunga politica “stiekum”. CAft a splica cu gastonan di gobierno a aumenta cu 30 miyon. CAft hungando su politica di “kak’i sconde” No a divulga na unda y di con. Pues CAft ta laga e contesta ey habri pa oposicion hunga politica cune.

P’esey nos ta manda advertencia pa CAft, ora bo bisa A bo mester bisa B tambe. Como cu CAft a deha di splica esaki mi ta haya mi obliga pa splica esaki pa kita tur duda for di pueblo pa un gobierno cu ta sacrificando pa saca Aruba for di e abismo. Berdad e gastonan a aumenta cu 30 miyon.

Berdad tambe ta cu den 2020 lo mester paga 18 miyon extra na PPP proyectonan di Mike Eman y AVP. Awor cu Watty Vos Boulevard a keda cla den 2020 mester paga e ‘volle pond’. Cu nos kier of no kier mester paga pa esakinan. Mike a grita cu e ta orguyoso di e debe y e debe t’ey pa pueblo bay pag’e den futuro. Momento di berdad a yega y mester paga e proyectonan aki.

   Aumento di gastonan di AZV:

E di dos aumento di gasto ta di AZV. Gobierno tin un compromiso mediante ley (wettelijke verplichting) di AZV cu gobierno tin e deber di cubri mediante Landsbijdrage cualkier deficit di AZV.

Pronostico di AZV ta conforme expectativa cu gobierno lo mester reserva 12 miyon pa cu 2020. Pues 18 miyon pa paga proyectonan PPP di AVP y Mike Eman mas reservacion di 12 miyon Landsbijdrage pa AZV  cu ta suma e 30 miyon Florin.

Kico tabata e problema cu CAft solamente kier a hisa benta aumento di gasto pero no tabata tin e decencia pa raporta e berdad den su conseho?

Parlamentario Endy Croes kier recorda pueblo cu a haya un pais financieramente na rand di bancarota. Un gobierno di AVP kende a redobla nos debe prestando 2200 miyon Florin den 8 aña. Asina por sigui nombra hopi mas di e desasternan.

No ta facil pa maneha e barco aki y sak’e den 2 aña for di tur cos. Lo tuma su tempo pero si por garantisa pueblo cu nos ta riba e bon caminda. Hunto nos lo laga atras un mihor Aruba pa nos yiunan y nos futuro generacion, Croes a splica. Cu boluntad, pasenshi y perseverancia nos ta logra.

- Advertisement -

DUNA COMENTARIO

Please enter your comment!
Please enter your name here