Home Hudicial Fiscal a exigi 2 aña di prison pa homber cu a hinca...

Fiscal a exigi 2 aña di prison pa homber cu a hinca dos otro cu cuchiu

367
0
SHARE
- Advertisement -

E sospechoso ta para riba cu e no a haci nada

ORANJESTAD (AAN): E homber Dominicano W.A.S. ta para riba cu e no a haci nada y cu el a sali for di e club nocturno y bay.

Pero Fiscal ta haya cu tin prueba cu W.A.S. a hinca dos homber cu cuchiu y a exigi 2 aña di prison, teniendo na cuenta cu actualmente W.A.S. ta sintando 3 aña pa un caso di intent di mata. Abogado mr. Carlos hunto cu mr. Tromp ta haya cu e declaracion di e victimanan ta contradictorio y no tin suficiente prueba. Hues awor ta bay studia e caso pa aki tres siman dicta sentencia.

   HINCA DOS HOMBER:

Fiscal a bisa Hues cu S. ta worde acusa cu dia 10 Juni 2018, el a purba di mata un homber na Eclipse na Noord y a causa herida severo na un otro. E homber J.U.G. a sufri hinca na pecho y den bariga mientras cu e homber N.S.L. a sufri hinca den man.

Hues a puntra S. kico a sosode. Segun S. e no tin nada di haci cu e caso aki. El a bisa Hues cu el a duna declaracion na Polis caminda el a bisa cu e tabata cu un muher pero no tin nada di haci cu e caso.

Hues a puntra si e tabata den e bar Eclipse. El a bisa cu e tabata den e bar y tabatin un discusion cu su pareha dama caminda e dama a dal’e. Esey pasobra el a bay cumpra siga for di un muher y su pareha tabata jaloers. Segun S. el a bay e ora den negoshi un tiki mas pariba, esta Lekker Bar pa e bisa un conoci cu e ta bay y a sali bay.

Hues a bisa cu e homber J., cu ta e conoci cu S. ta bisa cu tabata den Lekker Bar, a bisa cu el a topa “sicario” y cu esey ta S. Segun S. e unico persona cu ta yam’e asina ta su ruman homber y por ta J. a scuch’e y ta yam’e asina. J. a declara cu S. a bringa cu otro personanan pero e no a mira cuchio. S. a reacciona den Corte cu no ta asina. El a bisa cu el a bay y J. a keda den e bar. Hues a bisa cu J. a bisa cu S. a bringa cu e hombernan cu a haci denuncia di maltrato cu arma. S. a remarca cu e no sa pakico J. ta bisa asina.

   HINCAMENTO:

Hues a mustra cu dos homber a resulta hinca e anochi di 10 Juni 2018. Un den pecho, man y barica. E hinca den bariga tabata serio pasobra a perfora e tripa. E otro homber a sufri hinca den man robez cu a afecta nervio di man. Tur dos a keda hopi tempo sin por traha.

E dos hombernan a bisa cu nan tabata na Eclipse y a mira e discusion y pelea entre e homber S. y un dama. E homber J.U.G. a bay mete y a bay riba S. E momento ey S. a atak’e y J.U.G. a dal’e un mokete. S. a bay Lekker y a bolbe cu un otro homber y tur dos tabatin cuchiu. E otro amigo di J.U.G., N.S.L. a bisa cu ta asina. J.U.G. a sufri hinca na pecho y bariga mientras cu N.S.L. a sufri hinca na man.

Hues a sigui bisa cu J.U.G. a bisa despues cu e no sa kende a hink’e. N.S.L. a bisa cu J.U.G. a dal S. kende a bay Lekker. Ora el a bin back cu amigo, el a mira S. a purba hinca J.U.G. den pecho pero N.S.L. a dal’e cu un boter den man. Pero e momento ey ya caba J.U.G. a worde hinca y despues a hinca N.S.L. na su man. Segun N.S.L., el a bolbe dal S. y e ora ey S. a bay.

E sospechoso S. den Corte, ta para riba cu no ta asina y cu ningun momento el a bringa. Hues a bisa cu e yiu muher di J.U.G. tambe tabata den e nightclub y el a bisa cu nan a mira un homber tabata maltrata un muher y su tata a bay mete y pusha e homber. Despues e homber a bay den direccion Lekker y a bolbe cu un otro.

Nan a bay den direccion di su tata y esun cu a bringa cu su tata, tabatin cuchiu y e otro tambe. Nan a bay bringa cu su tata y S. a hinca su tata den pecho y e otro a hinca su tata den barica. Hues a bisa cu tanto J.U.G., N.S.L. y e yiu muher di J.U.G. ta reconoce S. como esun cu a hinca.

Hues a bisa cu tabatin mas testigo cu a mira e hincamento sosode. E testigo homber a bisa cu e ta reconoce S. como e homber cu a hinca J.U.G.

E sospechoso S. a keda para riba cu e no a bringa ningun momento. El a bisa cu e no sa pakico e hendenan ta bisa cu ta e.

Hues a mustra cu aña pasa Corte a condena S. na 3 aña di prison pa intento di mata y cu e ta sintando e castigo aki. Tin un raport di psicologo cu ta mustra cu S. ta responsabel pa su actonan y cu e chens cu algo asina lo ripiti ta grandi, si acaso S. no haya ayudo.

   EXIGENCIA DI FISCAL:

Fiscal a bisa Hues cu e ta haya legalmente proba cu S. a hinca e dos hombernan. Tur dos victima a declara cu e dos hombernan entre otro S. a bin riba nan cu cuchiu. Na opinion di Fiscal, ta un hecho cu tur dos victima a worde hinca. E victima J.U.G. su tripa a worde perfora y e mester a worde opera di biaha.

E homber N.S.L. tambe mester a worde opera na su man caminda a corta un nervio. Fiscal a bisa cu tur dos victim a keda hopi tempo sin por traha. Fiscal ta haya cu pa J.U.G. por papia di maltrato serio mientras cu N.S.L., herida serio. Fiscal a cuestiona e hecho cu S. ta keda para riba un no. Fiscal a bisa cu e ta tene cuenta cu e castigo recien di 3 aña y a exigi 2 aña di prison.

   ABOGADO:

  1. Carlo, kende tabata acompaña pa mr. Tromp, a bisa Hues cu S. ta keda para riba cu e no a hinca ningun hende. E abogado a bisa cu tin asina hopi contradiccion cu no por bisa cu ta S. ta esun cu a hinca e dos personanan. A base di e declaracion di e dos victimanan, por conclui cu tabatin un discusion y pelea entre e pareha.

Conforme declaracion, a kita S. di bati su pareha. S. a core bay Lekker y bin cu un otro amigo caminda nan a worde ataca y hinca. Mr. Carlo a menciona algun testigo cu ta mustra cu no ta S. a hinca. E abogado a mustra cu tin testigo cu a bisa cu ora S. a worde pusha, e otro persona tabata tey caba y a pasa S. un cuchiu. Otronan ta bisa cu S. a bay Lekker y bolbe cu un otro. E victima N.S.L. ta bisa cu S. a hinca J.U.G. na su man y e otro na su bariga.

E abogado a mustra cu N.S.L. a señala un persona cu e ta bisa cu ta esun cu a hink’e. E persona aki a worde deteni y despues a worde laga liber. E abogado a mustra cu e guardia a bisa cu ta 7 homber Dominicano a core tras di e dos Colombianonan. E abogado ta puntra su mes con por confia declara di victimanan. Nan lo tabata bebi y no ta corda kende realmente a hinca. Nan a mustra riba S. siendo cu S. no ta esun cu a hinca.

E partner di S. a declara cu nan tabatin discusion y S. a pushe y el a cay. Despues el a bay den auto pero no ta bisa nada di hincamento. Mr. Carlo a bisa Hues cu riba camera di Lekker por mira S. sin ningun cuchiu siendo cu e otro si tabatin boter den man. E abogado a conclui cu no por bisa cu S. ta esun cu a hinca y ta haya cu mester declara S. liber. E victima mes, J.U.G. mes no por bisa ta kende a hink’e. E ta haya cu tin duda kende a hinca y pesey ta pidi Hues pa declara S. liber.

Hues a sera tratamento di e caso y a bisa cu 31 Januari 2020 pa 8:15 am lo tin sentencia

.

- Advertisement -

DUNA COMENTARIO

Please enter your comment!
Please enter your name here