Gobierno di Aruba y CCDN ta haci invitacion na e pueblo di Aruba pa celebra Dia di Betico den famia

    173
    0
    SHARE
    - Advertisement -

    ORANJESTAD (AAN): Tur aña nos ta celebra Dia di Betico riba 25 di Januari recordando e gran estadista den nos historia politico di Aruba. E aña aki Dia di Betico lo ta riba dos dia, esta dia 24 di januari 2020 ta e manifestacion cultural y dia 25 di januari e ceremonia protocolar.

    Segun Comision Celebracion Dianan Nacional (CCDN), e manifestacion cultural di diabierna 24 di januari ta tuma luga for di 07:00 p.m. – 10:30 p.m. cu e tremendo concierto di oro di Grupo di Betico di nan 50 aña di existencia, como regalo na e pueblo di Aruba. Lo tin e presentacion di diferente artista, e feria artesanal, cuminda crioyo y boca dushi, y e famoso skina pa mucha.

    Diasabra 25 di Januari 2020 lo tin e ceremonia protocolar cu lo inicia 09:00 am, presentacion di coro ‘Muchanan Sabi’, sigui pa ofrenda floral y despues por felicita e mandatarionan. Ambos actividad ta tuma luga na Plaza Libertador Gilberto François (Betico) Croes riba Vondellaan.

    E aña aki nos ta den celebracion di 34 aña di nos Status Aparte y 44 aña di nos Himno y Bandera. Dos celebracion cu Sr. Gilberto François (Betico) Croes tabata un arkitecto den realizacion di esakinan.

     

    Un tiki di Señor Betico Croes, d.f.m.;

    Si nos pensa riba Sr. Gilberto François (Betico) Croes, esaki ta hiba nos riba e meneer di scol cu semper a educa su alumnonan cu yen di amor y a sa di hinca den cada mente y curason di su alumnonan e importancia di kico ta nos norma y balornan di un pueblo creando e amor patrio patriotico. Un tata pa su famia y di un famia mas grandi cu tabata su pueblo di Aruba. Betico tabata un persona cu hopi carisma y a sa di gana hopi admiracion y confiansa den e pueblo di Aruba. E deportista cu tabata gusta su table tennis. Awe nos tin nos Status Aparte ta danki na su persona cu a continua cu e lucha aki cu a nace for di den añanan 40.

    Betico no tabata kier solamente Status Aparte, sino e lucha pa un miho bida, un miho futuro, un miho Aruba cu e bos di pueblo ta bos di Dios. Tabata riba dia 2 di april 1992 cu Gobierno di Aruba a decreta Dia 25 di januari, riba dia di su fecha natal, un dia conmemorativo pa recorda Betico Croes. Dia 25 di januari hisa bo bandera y honra e gran yiu di tera. Ban duna balor na Betico Croes cu ta un persona cu a lucha y logra pa Aruba su Status Aparte.

    Gobierno di Aruba y CCDN ta haci invitacion na e pueblo di Aruba pa ban celebra Dia di Betico den famia. Cu respet, honor y danki na dje ta bay un peticion na e cuidadania pa cu respet y honor hisa bo bandera di Aruba.

     

    - Advertisement -

    DUNA COMENTARIO

    Please enter your comment!
    Please enter your name here